Ministru Petróleu no Minerais (MPM), Víctor da Conceição Soares hateten, governu nafatin mantein Beasu hanesan fatin refinaria tanba konsidera gasta ona osan barak hamutuk tokon US$ 20 hodi halo estudu.

"Dehan atu muda fali mai iha ne'e (Natarbora) gasta tan, la hatene gasta tan hira? Depois iha ne'ebá indenizasaun, iha ne'e indenizasaun tan, halo nusa? Ne'e estudu halo ona, PEDN define ona, nusa mak halo fali hanesan ne'e? Se hanesan ne'e hela de’it ne'e labele, ita tenke halo desizaun ida ne'e katak A-A, B-B, metan-metan, mutin-mutin," dehan Víctor da Conceição Soares ba www.tempotimor.com, nia knaar fatin, Mandarín, Dili, Segunda (24/8).

Víctor hateten, Ministériu Petróleu no Minerais ne'ebé hola parte mós iha Ministériu Planu Ordenamentu Territoriál sei ajusta hamutuk hanoin oinsá atu estudu viabilidade kle'an liután iha área Tasi-Mane ligadu ho agrikultura povu iha área ne'ebá.

Nune'e, polítika Ministériu Petróleu no Minerais nian kontinua nafatin, maibé daudaun ne'e sei pendente tanba sei presiza tuur hamutuk entre linã ministeriál hodi diskute no ajusta hanoin depois kontinua deside liuhusi Konsellu Ministru.

"Ne'e desizaun Estadu, Governu nian mak tenke ida de'it, labele ida-idak ba deside halo ninian. Se lae ita fakar osan de’it, envezde kuda osan para hetan funan mas hakoi fali osan," dehan Víctor

Tanba dezenvolve infraestrutura hanesan Auto-estrada iha Kosta Súl, balun la’o ona. presiza halo supply base ka refinaria Betanu, planta LNG iha Beasu.

Instrusaun ne'ebé governu fó tenke kontinua ho nafatin polítika ne'ebé relasaun ho Tasi-Mane, atu viabiliza ida ne'e presiza iha servisu hamutuk, katak governu iha reestrutura nia orgánika governu tomak hamosu ministériu ida bolu dehan planu no ordenamentu.

Planu ordenamentu ne'e iha ministériu lubuk ida ne'ebé integra iha laran. Entaun hotu-hotu, ne'ebé boot inklui Tasi-Mane hanesan Ministériu Petróleu no Minerais ne'e tenke integra hotu iha planu ne'ebé Ministériu Planu no Ordenamentu koordena hela ne'e.

Víctor akresenta, ministériu sira hala'o estudu ajustamentu depois halo analiza hamutuk inklui Ministériu Petróleu no Minerais. Tanba ne'e, enkuantu reestruturasaun seidauk iha konkluzaun ba analiza ka estadu foun ne'ebé ministériu agora halo, signifika projetu sira iha ne'ebá ne'e sei pendente hodi hein orientasaun husi rezolusaun Konsellu Ministru. (*)