Programa sira ne’e mak hanesan; akompaña asuntu parlamentár no koordenasaun entre governu no Parlamentu Nasionál, boa governasaun no jestaun institusionál, diseminasaun informasaun kona-ba asaun governativa no programa dezenvolvimentu nian, durante liberdade espresaun no asesu ba informasaun no enkorajamentu diversidade meius komunikasaun sosiál.

Iha programa sira ligadu ho asuntu parlamentár nian MAPKomS sei konsentra iha atividade atu masimiza koordenasaun ho bankada sira no konferénsia lider bankada sira iha PN, koordenasaun ho komisaun espesializada no plenáriu PN.

Aleinde ne’e, sei reforsa servisu komunikasaun sosiál iha PN, organiza programa talk show Rádiu iha Metro FM ligadu ho asuntu sira Parlamentár nian no dezenvolve mekanizmu kooperasaun ho PN atu estabelese Televizaun Parlamentár.

Programa boa governasaun no jestasaun institusionál, sei konsentra iha atividade sira oinsá atu define kuadru jurídiku sira relasiona ho funsionamentu instituisaun nian no oinsá hametin instituisaun liuhusi hasa’e kapasidade rekursu umanu MAPKomS nian hodi asegura halo jestaun di’ak iha aspetu finanseira, administrasaun, lojístika no aprovizionamentu nian no iha kapasidade atu halo planeamentu, monitorizasaun no avaliasaun.

Iha programa diseminasaun informasaun, MAPKomS sei konsentra iha atividade disemina informasaun hotu-hotu relasiona ho asaun governativa nian husi VIII Governu Konstitusionál no sei uza ho másimu meiu komunikasaun sosiál hotu ne’ebé eziste ho plataforma dijitál oioin ne’ebé iha, atu fasilita di’ak liután tranzmite no sirkula informasaun sira ba públiku ein jerál iha territóriu nasionál, rejionál no internasionál.

Aleinde ne’e, sei masimiza mós servisu produsaun audiovizuál nian hodi aumentu produsaun pakote informativu nian ho formatu televiziva no formatu rádiu nian.

Iha programa ne’e mós MAPKomS sei buka mekanizmu kooperasaun ida ho órgaun komunikasaun sosiál privadu sira hodi asegura hakonu povu nia diretu atu asesu ba informasaun sira kona-ba prosesu no progresu sira dezenvolvimentu nian.

Atu hatene impaktu husi informasaun sira ne’ebé governu divulga, iha programa diseminasaun informasaun nian ne’e mós oposta iha atividade halo asesmentu ba persesaun públiku nian ba programa sira ne’ebé governu implementa.

Programa garante liberdade espresaun no asesu ba informasaun sei kontinua ho apoiu sira ba TATOLI - Ajénsia Notisioza Timor-Leste, IP, ho ninia atividade prinsipál sira hanesan, reforsa funsionamentu instituisaun, garante fasilidade no ekipamentu servisu adekuadu no modernu, reforsa servisu redasaun ba espansaun konteúdu no asegura kualidade iha publikasaun notísia sira no reforsa parseria ho media nasionál no ajénsia notisioza internasionál sira.

Aleinde TATOLI, iha programa ne’e sei fó atensaun másimu mós ba apoiu iha promosaun no konsolidasaun papél RTTL.EP, liuhusi atividade sira hanesan apoia kriasaun planu estratéjiku no planu negósiu RTTL nian no investe iha infraestrutura (edifísiu no torre sira).

Nune’e mós sei fó apoiu nafatin ba Konsellu Imprensa, nu’udár órgaun independente reguladór ba setór komunikasaun sosiál no atividade elabora lejizlasaun nesesária sira iha área komunikasaun sosiál nian, entre sira ne’e ida mak Lei Radiodifuzaun nian, alterasaun ba lei komunikasaun sosiál no seluk tan.

Estabelese institutu formasaun ba jornalista mós hola parte iha programa garante liberdade espresaun no asesu ba informasaun, iha atividade ne’e MAPKomS sei kolabora ho Konsellu Imprensa, organizasaun jornalista sira nian, instituisaun akadémika sira iha rai-laran no parseiru internasionál sira hodi buka forma ida di’ak liu ba harii futuru instituisaun formasaun jornalista Timor-Leste nian.

Formasaun iha téknika sira komunikasaun nian mós sai prioridade ida iha programa ne’e. Formasaun ne’e ninia benefisiáriu sira mak ofisiál relasaun públiku no komunikasaun sosiál iha governu nia laran.

Ikus liu, programa enkorajamentu diversidade meiu komunikasaun sosiál, iha programa ne’e sei konsentra iha promosaun no dezenvolvimentu média lokál sira, fó apoiu kontinua ba estasaun rádiu komunidade sira ne’ebé eziste no harii tan estasaun rádiu komunidade foun balun. Aleinde ne’e, sei implementa mós programa Naroman ba Suku.

Atividade importante seluk iha programa ne’e, MAPKomS sei servisu hamutuk ho organizasaun jornalista sira nian, asosiasaun ema ho defisiente sira no organizasaun feto sira nian. (*)