Xefe Estadu hato'o mensajen ne'e liuhusi diskursu Iha selebrasaun Loron aniversáriu FALINTIL ba dala 45, iha Kuartél Jenerál, Fatuhada, Kinta (20/8).

Nia dehan, dalan atu fó onra loloos ba eroi pátria, no ba veteranu kombatente libertasaun nasionál sira maka Estadu presiza buka solusaun ba dadus lubuk ida ne'ebé ohin loron la rezolve.

" KKLN ida ne'ebé harii hodi defende interese kombatente sira-nian, atu identifika no buka solusaun hodi hadi'ak dadus lubuk ida ne'ebé sei pendente hela, inklui dadus kona-ba veteranu falsu sira," dehan PR Lú Olo.

Nia afirma, meius ida ne'e importante ona maibé tenke halo hamutuk ho Ministériu Asuntu Kombatente Libertasaun Nasionál.

Vizaun atu valoriza ne'e nia dehan tanba Tempu to'o ona atu prezerva istória loloos ba jerasaun sira tuir mai tanba Istória loloos mak sei sai abut no valór ne'ebé metin ba jerasaun sira tuir mai.

Nune’e, husu ba Governu atu kolabora no halibur dadus hosi kombatente, organizasaun rezisténsia no ema hotu, atu fó apoiu ba ekipa ka organizasaun sira hanesan Komité Orientadór 25, Komisaun Peskiza no Elaborasaun Istória Luta Feto Timor, Sentru Audiovizuál Max Stahl, Sentru Nasionál CHEGA, Arkivu no Muzeu Rezisténsia no organizasaun seluk tan.

Tanba, tuir nia, organizasaun hirak ne'e daudauk hahú rejista no hakerek istória kona-ba papél organizasaun rezisténsia ka organizasaun juventude ka feto nian iha prosesu luta libertasaun nasionál.

"Ha'u husu ba veteranu no kombatente sira ne'ebé sei moris atu kontinua tatoli imi-nia istória rasik ba imi-nia oan no família sira no ba Povu tomak hodi hatutan ba jerasaun tuir mai," PR Lú Olo rekomenda. (*)

PUBLISIDADE HUSI MOP FO PARABENS BA LORON FALINTIL