Governu Deside Hanaran Ponte Laleia ho Nelson Mandela

Reuniaun Konsellu Ministru Reuniaun Konsellu Ministru Foto File

Tempotimor (Dili)-Governu liu husi reuniaun Konsellu Ministru deside hodi tau naran Nelson Mandela iha ponte foun iha Laleia, Munisipiu Manatuto.

Aprovasaun ne’e bazeia ba rezolusaun ne’ebé aprezenta husi Ministru Obras Públika, tanba konsidera Nelson Mandela nu’udar defensor boot ba Timor-Leste durante luta ba libertasaun nasional.

Liu husi komunikadu ne’ebé www.tempotimor.com asesu, KM informa, aprova ona rezolusaun relasiona ho atribuisaun ba Ponte Laleia, iha mota Laleia nia sorin, lokaliza iha estrada nasionál A01, ho naran “Nelson Mandela”, antigu Prezidente Áfrika Sul no Premiadu Nobel Paz, no defensór boot kauza Timor-Leste nian.

"Iha tinan ida ne’e, selebrasaun loron (internasional Nelson Mandela) ne’e konta mós kopresidénsia husi antigu Prezidente Repúblika Timor-Leste no Premiadu Nobel Paz, José Ramos Horta no selebra husi nasaun sira ne’ebé partisipa iha eventu ne’e ho atribuisaun naran “Nelson Mandela” ba ponte ne’ebé reprezenta obra no moris personalidade ne’e hanesan “Konstrutór Ponte Umanidade, mediasaun, ba rekonsiliasaun no paz,” deklara KM iha komunikadu ne’e.

Molok ne’e, eis Prezidente Repúblika José Ramos Horta hatete, Timor-Leste presiza mós valoriza kontribuisaun ne’ebé Nelson Mandela fó ona durante prosesu luta nia laran.

Tan ne’e, Horta iha ideia atu hanaran ponte Laleia nu’udar ponte Nelson Mandela.

Lee mós: Horta Sujere Tau Naran Nelson Mandela ba Ponte Laleia

Ideia ne’e, Horta hatete, nia informa ona ba Primeiru Ministru Taur Matan Ruak, no hetan resposta pozitivu tebes.

"Ponte Laleia ne'e seidauk inaugural, maibé ha’u hatete sai ona ba governu Timor i hein de'it governu ba inaugural, maibé ne'e Primeiru Ministru ho Prezidente Republika mak hatene," dehan nia.

Kona-ba razaun tanba sa mak hili ponte hodi tau naran Nelson Mandela, Horta esplika, tanba durante nia moris, Nelson Mandela sai ponte dialogu ba nasaun sira iha mundu tomak.

"Ha’u hakarak tau nia naran iha ponte tanba nia ema ida ne'ebé koñesidu nu’udar ponte halo dialogu ho mundu tomak. Nia ema ida konstrutór ponte dialogu ho mundu tomak," Horta hatete.

Rate this item
(0 votes)
Last modified on Friday, 14 August 2020 18:36
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.