Lia hirak ne'e hato'o husi Ministru MTKI, José Lucas do Carmo da Silva, iha Palásiu Governu, hafoin remata enkontru ho Primeru Ministru (PM) Taur Matan Ruak.
"Expo Dubai ne'e bazeia ba despaxu uluk ne'e, iha ona nia ekipa no orsamentu, maibé iha razaun balun ho asuntu ida ne'e, entaun paradu ka la'o, tanba ne'e mak ohin PM bolu Ministru MTKI mai para buka dalan no solusiona," dehan Ministru MTKI, José Lucas do Carmo da Silva ba jornalista sira iha Palásiu Governu, Kuarta (05/08)
Governante ne'e mós dehan, ohin simu ona orientasaun, katak tempu besik sei iha rezolusaun, hodi troka Kalbuadi Lay.
"Ohin simu ona orientasaun katak, tempu badak, sei iha rezolusaun husi KM, para delega fali kompeténsia expo Dubai nian ba ministru MTKI," nia dehan
Nia mós afirma, ema ida la hasai Kalbuadi husi nia kargu, maibé tanba servisu la la'o, entaun durante ne'e governu husu atu señor Kalbuadi aprezenta karta rezignasaun, maibé to'o agora laiha, tanba ne'e mak KM sei hasai rezolusaun ida, hodi nomeia ka delega fali lideransa foun, hodi troka Kalbuadi, tanba ne'e timor-oan se de'it mak lidera, importante Timor tenke ba oin.