Tempotimor (Dili) - Ezbosu Lei Kódigu Mineiru ne'ebé atu regulariza riku-soin iha territóriu timor laran ne'e.

Komisaun D trata asuntu ekonómiku, presiza diskute ho kuidadu oinsá mak di'ak ba Estadu iha futuru.

Deputadu Bankada CNRT, Adérito Hugo da Costa, nu’udar mós proponente ba proposta ezbosu Lei Mineiru, la aseita deputadu FRETILIN ne'ebé ezije atu aselera lalais diskusaun no aprovasaun lei ne’e iha tempu resesu.

Nia dehan, diskusaun ne'e kleur tanba presiza buka hatene ninia substánsia balun atu kompleta molok aprova lei ne’e.

Tanba nia, dehan, ezbosu Lei Kódigu Mineiru ne'e atu regula riku-soin tomak iha Timor-Leste no la'ós uza lei ne'e arbiru.

Ho preokupasaun ne'e husu ba meza Komisaun D PN atu labele realiza debate ida iha tempu resesu, tanba debate ne'e presiza hetan partisipasaun husi komponente sira hotu.

Ba kestaun ne'e, Prezidente Komisaun D, Antonino Bianco deklara, lei ne'e foin lalais aprova ona iha lider bankada ho unanimidade, signifika CNRT mós konkorda atu debate.

Maibé, nia hakfodak bainhira Deputadu CNRT kestiona fali proposta deliberasaun rezolusaun ne'ebé atu fó oportunidade ba komisaun D hodi debate ezbosu lei mineiru iha tempu resesu.

"Ita kuandu hakarak servisu ba nasaun no Estadu ita la presiza haree ba tempu feriadu, tanba tipu servisu ne'e atu iha tempu resesu mós ita bele servisu," dehan Antonino. (*)