Hanesan públiku hatene, iha 10 Jullu 2020, Xanana Gusmão deside hodi rezigna an husi nia kargu nu’udar Xefe Negosiadór Prinsipal Delimitasaun Fronteira Maritima
Ezijensia husi Bankada FRETILIN ne’e mosu, tanba to’o oras ne’e PN seidauk asesu ba dokumentus relasiona ho serbisu ne'ebé Xanana ho nia ekipa halo, liu-liu kona-ba akordu ba konstrusuan portu Beaço.
Reprezentante Bankada FRETILIN, Marito Mota dehan, bankada FRETILIN ezije ida ne’e tanba Xanana reprezenta estadu bainhira halo negosiasaun kona-ba dezenvolvimentu projetu Tasi Mane no asina akordu balun ho parseiru sira husi rai li’ur.
"Ohin loron nia (Xanana) rezigna an ona husi ninia knar maibé to'o agora PN seidauk haree no rona informasaun kona-ba akordu ne'e rasik," dehan Marito iha PN, Tersa (21/07).
Tuir informasaun ne’ebé Marito hetan, iha akordu ho kompaña Estatál ida husi Xina atu halo konstrusaun portu iha Beaço ho valór kontratu inisiál besik billaun $1.
"Foin lalais Xanana rasik deklara iha media katak projetu Beaço sei muda fali ba Natarbora maibé to'o agora la hatene ezekuta to'o ona iha ne'ebé."
Tan ne’e, nia hatete, se karik akordu ida ne'e Xanana ho Timor GAP mak asina no konklui ona, entaun fó dokumentu ne'e ba Parlamentu Nasionál atu nune'e públiku iha Timor-Leste tomak mós bele hatene.
Ba kestaun ne'e, deputadu bankada CNRT Patrocino hatete, prosesu ba ida ne’e finaliza ona, tan ne’e bainhira bankada FRETILIN kestiona signifika tau iha kestaun integridade Xanana.
“Maske ita-boot sira kestiona integridade maun boot Xanana kona-ba dada kadoras mai Timor-Leste, maibé ha’u hanoin bankada CNRT apoiu sein rezerva no husu ba Governu Jeneral Taur Matan Ruak nian atu dada duni kadoras mai TL," dehan nia.