Hanesan públiku hatene, Xanana hato’o ona ninia rezignasaun husi kargu nu’udar Xefe Negosiadór Prinsipal ba Delimitasaun Fronteira Maritima.
Relasiona ho rezignasaun Xanana, PM Taur hatete, to'o agora governu seidauk iha ema troka Xanana.
"(Xanana) Rezigna tiha ona, asuntu ne'e taka tiha ona, hotu ona, kona-ba troka, pur-enkuantu seidauk, seidauk iha ema ida," dehan Taur ba jornalista sira hafoin hasoru-malu ho Prezidente Repúblika (PR) Francisco Guterres Lú Olo iha Palásiu Prezidensiál Bairu-pite Dili, Kinta (16/07).
PM Taur hatete, responsabilidade ba fronteira tasi no dada kadoras mai Timor-Leste ne'e governu nian.
Kona-ba prosesu atu dada kadoras mina mai TL, Xefe Governu ne’e dehan, sei presiza tempu naruk.
"Dada kadoras mai Timor-Leste ne'e prosesu ida ne'ebé ita hotu nia mehi no hanoin ba tinan barak, entaun ne'e prosesu ida ne'ebé sei lori tempu, sa tán agora ita iha tempu Covid, mina folin tuun, ne'ebé prosesu ne'e sei lori tempu naruk tan," dehan Taur.