Tempotimor (Dili)-Xefe Estadu Maiór FALINTIL Forsa Defeza Timor-Leste Maijór Jenerál Lere Anan Timur hatete, governu konstitusional daualu ne'ebé lidera husi Primeiru Ministru (PM) Taur Matan Ruak iha dalan ne’ebé sei naruk atu hetan susesu.

Tuir Lere maske situasaun politika iha Timor-Leste seidauk estavel loloos, maibé governu kontinua la’o di’ak.

Tan ne’e, nia hein katak, governu ne’ebé PM Taur lidera sei susesu hodi halo povu moris hakmatek, ksolok, no moris iha dezenvolvimentu nia laran.

"Ita hatene katak ita-nia governu la'o ho di'ak, mais ita hein katak susesu ba sira-nia dalan ne'ebé mak sei naruk, to'o 2023, halo oinsa mak ita-nia povu nia moris hakmatek, moris haksolok no moris iha dezenvolvimentu, ida ne'e mak importante liu," dehan Maijór Jenerál Lere hafoin hasoru malu ho Prezidente Repúblika Francisco Guterres Lú Olo iha Palásiu Prezidensiál Bairu-pite Dili, Kuarta (08/07).

Lere preokupa uitoan mós kona-ba insulta no akuza malu entre lider sira ne’ebé kria konfuzaun ba Timor-oan sira, liu-liu joven sira.

"Dala-ruma ita-nia juventude sira mak konfuzu tanba lider sira insulta malu, ida ne'e, imi jornalista sira mak hatene liu, tanba halo interpretasaun ne'ebé loos, balun la loos, distursaun, maibé ida ne'e ita hotu nia preokupasaun polítika," nia dehan.