Tuir Lere, asaun husi Alkatiri ne’e nu’udar asaun ne’ebé di’ak tanba la kanta demais iha públiku hodi kria de’it konfuzaun.
"Lider sira akuza malu, maibé loloos ne'e mak maun Marí Alkatiri halo ne'e, nia nonok ba de'it tribunal, lalika kanta demais iha públiku par kria konfuzaun ba ema, depois atu fiar mak di'ak ka la la fiar, maibé loloos mak maun Marí Alkatiri halo ne'e, se iha buat ruma, lori ba tribunal, par tribunal mak tesi," dehan Lere ba jornalista sira iha Palásiu Prezidensiál Bairu-pite, Dili, Kuarta (08/07).
Lere afirma, asaun ne’ebé Alkatiri halo di’ak liu, duke Abilio Araújo no Rogeiro Lobato ne'ebé kanta de'it.
"Lori ba tribunal ne'e mak loos, la'ós hanesan Abilio Araújo no Rogeiro Lobato ko'alia katak ‘naok mina hanesan ne'e, naok osan hanesan ne'e’. Hahalok sira ne'e só par kria de'it konfuzaun ba ema kiik, enkuntu ema boot sira moris di'ak, simu osan boot, depois kria de'it konfuzaun ba ema kiik sira-nia ulun, mais katuas Marí (Alkatiri) halo ne'e mak loos ona, par buat ne'e trava dala ida de'it," dehan Lere.
Maske situasaun polítika ligadu ho lider 74 sira ne’ebé akuza malu la'o namanas, maibé, Lere apresia, ba povu TL ne’ebé la preokupa.
“Maske situasaun polítika ligadu ho lider 74 sira-nian ne'ebé halo akuzasaun la'o namanas, maibé povu matenek, tanba idaidak preokupa ba moris no familia,” dehan nia.
