Login to your account

Username *
Password *
Remember Me

MAE Miguel no Mehi ba Eleisaun ne’ebé Kredibel (parte 2)

Ministru Administrasaun Estatal Miguel Pereira de Carvalho, Vise Ministru Administrasaun Estatal ho Xefe Gabinete Ministru nian iha reuniaun ida iha MAE Ministru Administrasaun Estatal Miguel Pereira de Carvalho, Vise Ministru Administrasaun Estatal ho Xefe Gabinete Ministru nian iha reuniaun ida iha MAE Foto File Midia MAE

Tempotimor (Dili)-Kada tinan lima binhira Timor-Leste hala’o eleisaun Prezidensial no Parlamentar sempre mosu kritika no lamentasaun kona-ba kredibilidade husi eleisaun refere. Atu evita ida ne’e, Ministru Administrasaun Estatal Miguel Pereira de Carvalho sei esforsu hodi buka no hadia buat ne’ebé naksalak.

Miguel Pereira ne’ebé hetan fiar husi Primeiru Ministru Taur Matan Ruak hodi lidera Ministériu Administrasaun Estatal konsiente katak kredibilidade eleisaun ne’ebé Timor-Leste realiza sempre hetan kritika.

Tan ne’e, iha ninia mandatu, maske ho tempu ne’ebé konsidera barak de’it, nia sei esforsu atu bele realiza eleisaun ne’ebé kredibel, transparente no independente.

Iha tinan 2022, Timor-Leste sei hili fila fali ninia ema ida ne’ebé di’ak hodi assume kargu nu’udar Prezidente Repúblika, no iha tinan 2023, partidu politiku sira sei kompete hodi hetan konfiansa husi povu.

Atu prosesu eleisaun ne’e bele la’o ho di’ak, Ministru Miguel sei serbisu hamutuk ho Sekretariadu Tekniku Administrasaun Eleitoral (STAE) hodi deskute atu bele hetan solusaun.

“Dezafiu saida mak sira infrenta, krítika anterior ne'ebé mak sira simu, pelumenus iha tinan 10 nia laran ne'e kritiku husi lider polítiku sira, saida mak sira simu. Entaun ha'u hakarak deskute ho sira kona-ba dadus eleitoral, resensiamentu eleitoral, tabulasaun rezultadu eleisaun sira”.

 

 MAE, Miguel Pereira de Carvalho Ko'alia ba Jornalista www.tempotimor.com

 

“Ha’u sei deskute ho sira par se presiza hadi'a sistema, entaun ita hadia sistema ne'e, inklui mós ideia sira husi partidu polítiku sira par oinsa mak ita bele hadi'a sistema ba eleisaun ne'ebé mak sei mai, par bele kredibel,” dehan Ministru ne’e.

Atu hatene di’ak liu tan hanoin husi Ministru Administrasaun Estatal, Miguel Pereira de Carvalho (MPC), www.tempotimor.com (tt.com) halo intervista esklusivu iha nia knar-fatin, foin lalais.

 

tt.com: Senor Ministru, ita-boot ninia tempu serbisu liu tinan ida de'it, saida mak ita-boot halo atu bele atinze planu ne’ebé ita-boot iha?

MPC: Ha'u nia hanoin, prioridade primeiro mak, oinsa ita-nia populasaun bele sente iha diferensa relasaun ho atendimentu ne'ebé mak halo husi autoriedade komunitáriu sira, adminiatrasaun postu no munisípiu sira, no mós lalaok serbisu ne'ebé durante ne'e la'o iha sentral ne'e ladun di'ak, bele halo di'ak liu tán.

Purtantu, ha'u aposta ba disiplina funsionáriu ninian no garante par funsionáriu sira tenke iha termu referénsia, indikador dezempeñu atu funsionáriu sira mai halo serbisu, atu nia impaktu ne'e sidadaun sira bele hetan benefísiu ka sente, katak iha atendimentu ne'ebé mak di'ak liu tán husi suku, postu no munisípiu.

 

 

Komunidade partisipa iha Elisaun jeral iha Timor Leste    

 

Entaun, ha'u hanoin, ha'u hakarak hadi'a administrasaun Munisípiu, no mós postu sira, relasaun ho funsionáriu públiku sira nian ba diveres espesífiku no jerais sira ne'ebé mak hatuur iha estatutu Funsaun Públika nian.

Saida mak ha'u hanoin, ha'u bele halo, mak hanesan ohin ha'u ko'alia, lalaok ka instrumentu sira ne'ebé mak hatuur ona iha deskonsentrasaun serbisu, ne'e tenke implementa ho loloos, par depois munisípiu sira bele hatene no halo tuir regra sira ne'ebé estabelse ona iha dekretu lei nú. 03/2016 ne'ebé mak aprova ona ba autoriedade nasional no munisipal sira. Ne'e ita ko'alia kona-ba melloramentu programa PNDS hodi programa PDIN sira bele to'o iha Munisipiu par depois bele dezenvolve infra-estrutura iha baze.

Seluk ne'ebé mak ha'u hanoin mak enkuadramentu legal ba desentralizasaun nian, poder lokál nian. Lei ne'e bele prepara ona, lori ba Konsellu Ministru no Parlamentu Nasionál. Ha'u espera sasan sira ne'e bele halo iha tempu badak. Depois iha mandatu ida ne'e mós ita sei realiza eleisaun rua, iha 2022 eleisaun Prezidensiál no 2023 iha eleisaun Parlamentár, entaun saida mak ha'u atu rai? Ida ne’ebé ha’u hakarak rai mak garantia eleisaun iha 2022 no 2023 sai eleisaun ne'ebé kredivel, transparante, independente par halo ema internasionál bele fiar, inklui Timor mós fiar ba rezultadu eleisaun ne'e, katak eleisaun ne'e lao ho loloos. Purtantu, sasan sira ne'e mak ha'u rai hela durante iha mandatu badak ne'e.

 

tt.com: Senor Ministru bazeia ba esperensia ne’ebé liu ona, ema sempre kestiona rezultadu eleisaun, maibé ohin ita-boot hatete hakarak garante eleisaun ne’ebé kredibel atu ema hotu-hotu bele fiar, saida mak ita-boot sei halo atu atinze ida ne’e?

MPC : Ministériu Administratasaun Estatal liu husi Sekretariadu Tekniku Administrasaun Estatál (STAE) hanesan orgaun ezekutivu ida ne'ebé mak jere eleisaun, kontinua fiskalizadu husi Komisaun Nasional ba Aprovizionamentu no entidades públiku sira seluk. Entretantu STAE sei hala'o ninia serbisu tuir atribuisaun serbisu ne'ebé mak fó ona ba iha ne'ebá atu bele garante katak eleisaun ne'e bele la'o ho di'ak no kredibel par públiku bele fiar.

Entaun, ha'u sei serbisu hamutuk ho STAE par deskute hamutuk dezafiu saida mak sira infrenta, krítika anterior ne'ebé mak sira simu, pelumenus iha tinan 10 nia laran ne'e kritiku husi lider polítiku sira, saida mak sira simu. Entaun ha'u hakarak deskute ho sira kona-ba dadus eleitoral, resensiamentu eleitoral, tabulasaun rezultadu eleisaun sira. Ha’u sei deskute ho sira par se presiza hadi'a sistema, entaun ita hadia sistema ne'e, inklui mós ideia sira husi partidu polítiku sira par oinsa mak ita bele hadi'a sistema ba eleisaun ne'ebé mak sei mai, par bele kredibel.

Ha'u hanoin ita presiza introduz monitor, agora dadaun ne'e fiskalizadór ne'ebé mai husi fiskais eleitoral no mós fiskais partidu nian, provavelmente ita presiza mós halo husi observador internasional sira.

Ida ne'e hanesan ideia ne'ebé ita soe hela, mais konserteza seidauk iha lei, tenkte regula iha lei, mais ida ne'e hanoin ne'ebé ha'u sei deskute hamutuk ho tékniku sira, no mós parte relevante sira, hanesan partidu polítiku sira par bele haree.

Rate this item
(1 Vote)
Last modified on Tuesday, 07 July 2020 09:53
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« September 2022 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30    

Tempo Timor Networks

Online Counter