SEPAD: Kriminaliza Difamasaun, Proteze Korruptór

Diretór Ezekutivu SEPAD, João Boavida Diretór Ezekutivu SEPAD, João Boavida Foto arkivu

Tempotimor (Dili)-Sentru Estudu ba Pas no Dezenvolvimentu (SEPAD) konsidera katak bainhira esbosu Lei Kriminaliza Difamasaun ne’e aprova duni, sei blokeia implementasaun Lei Anti Korrupsaun, tanba lei kriminaliza difamasaun sei defende sira ne’ebé kaer ukun.

Diretór Ezekutivu SEPAD, João Boavida hatete, bainhira ukun-nain sira iha vontade, di’ak liu foka mak Lei Antí Korupsaun, duke halo Lei Kriminaliza Difamasaun.

“Ha’u hanoin iha buat ruma la loos. Saida mak la loos ne’e, ukun-nain sira mak tenke dehan ba ita, tanba sa? Ba see nia interese mak sira agora debate esbosu lei kriminaliza difamasaun atu aprova hodi implementa. Ulun-boot sira seidauk dehan ba ita tanba sa mak prioridade lei kriminaliza difamasaun ne’e. Se ezbosu ne’e sira aprova duni, sei ‘blokeia’ implementasaun Lei Antí Korrupsaun (LAK) tanba lei krimializa difamasaun ne’e defende hela sira-ne’ebé kaer ukun ne’e,” Diretór CEPAD ne’e ba jornalista sira iha nia rezidénsia, Bidau, Dili, foin lalais.

Joao mós kestiona, tanba sa mak Ministériu Justisa (MJ) preokupa liu ba esbosu lei kriminaliza difamasaun hahú kedan husi tempu estadu emerjensia ba Covid-19.

"Bainhira nasaun ida iha hela Estadu Emerjénsia hasoru situasaun perigu hanesan surtu COVID-19, entaun nein Parlamentu Nasionál no nein Governu hamosu situasaun ida ne’ebé atu aprova ka debate lei ida hanesan kriminaliza difamasaun, enkuantu ema hotu nia atensaun foku ba oinsa atu bele prevene no kombate COVID-19.”

Tan ne’e, Diretór SEPAD ne’e husu ba Ministru Justisa, Manuel Cárceres, atu esplika razaun prioritiza esbosu lei kriminaliza difamasaun.

Tuir nia, se esbosu ne’e ninia alvu atu kriminaliza mídia sosiál, entaun MJ nia razaun la forte.

"Ema sira ne’ebé ho lia-fuan iha facebook ne’e maioria mate-klamar (ID falsu). Agora governu atu kriminaliza? Entidade sira hanesan jornalista sira seidauk uza liafuan insulta hasoru ema boot sira,"dehan nia.

Nia hatutan, sai politiku no sai figura públiku tenke pronto simu kuandu ema la gosta, karik tanba ema haree katak figura ne’e falta transparénsia, akuntabilidade ka laiha responsabilidade.

“Se sira aprova duni lei difamasaun ne’e sei kaer ema ida, ninia implementasaun sei kaer fali sira rasik tanba sira baku-malu iha parlamentu. Sira estraga sasán estadu nian hanesan akontese iha parlamentu. Krime korrupsaun mós sira rasik mak prátika. Krime difama malu ne’e mós sira mak prátika ba malu,” dehan nia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.