Elizário Husu Funsionáriu SECoop Servisu Labele Kahur Ho Polítika

Sekretáriu Estadu Kooperativa (SECoop), Elizário Ferreira Sekretáriu Estadu Kooperativa (SECoop), Elizário Ferreira Foto Profile facebook Elizário

Tempotimor (Díli)- Sekretáriu Estadu Kooperativa (SECoop), Elizário Ferreira husu ba funsionáriu sira, bainhira hala'o servisu tenke ho profisionál labele kahur ho polítika hodi estraga profisionalidade.

"Ha'u husu Ba imi funsionáriu sira, atu servisu ho profisionál iha SECoop, tanba polítika ne'e ohin bele mai aban bele seluk fali, maibé profisionál sei nafatin", dehan Elizário hafoin hala'o serimónia transferénsia kargu, iha eis-Embaixada Portugal Acait, Kinta (25/06).

Nia mos dehan, ema ne'ebé hakarak servisu iha área kooperativa presiza domina didi'ak saida mak kooperativa no valores prinsípiu iha kooperativa nian.

SECoop atuál ne'e argumenta, atu garante ba governasaun ne'ebé sustentável bazeia ba efikásia no efisiente.Tanba birokrasia atu la'o di'ak depende ba funsionáriu sira hala'o servisu ho profisionál, durante halo sira nia knaar, tuir idak-idak nia pozisaun, iha instituisaun ruma.

"Tanba ne'e ha'u hein katak funsionáriu sira ne'ebé iha área kooperativa mínimu tenki hatene saida mak identidade Kooperativa, no ha'u mos la'os ema foun ne'ebé servisu iha área kooperativa.Tan nee ha'u mai hakarak hadi'a kooperativa, hanesan atu harii kooperativa ba fatin ne'ebé seidauk iha no habelár Kooperativa ba ema hotu, iha Timor-Leste", Nia hakotu

Ohin Sekretáriu Estadu Kooperativa (SECoop) sesante Arsénio Pereira entrega ona servisu ka kargu ba SECoop foun Elizário Ferreira hodi kontinua servisu no dezenvolve iha área kooperativa nian.

Rate this item
(4 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.