Angela Freitas Ezije PR Lu Olo Rezigna An, Ameasa Uza People Power

Angela Freitas Angela Freitas Foto Arkivu

Tempotimor (Dili)-Prezidente Partidu Trabalhista ne’ebé deklara aan nu’udar portavoz Rejistensia Nasionál Defende Justisa no Konstituisaun Republika Demokratika Timor-Leste (RNDJ-KRDTL), Angela Freitas ezije ba Prezidente Repúblika Francisco Guterres Lu Olo atu rezigna an.

Razaun husi ezijensia ne’e, Angela dehan, tanba PR Lu Olo la reprezenta ona povu no nasaun maibé reprezenta fali interese partidu politiku nian.

“Prezidente Republika la reprezenta ona povu no nasaun ida ne’e, ida ne’e iha ona interese partidu tanba ita haree katak prosesu nomeiasaun (ba membru governu) to'o tomada de posse," dehan Angela liu husi konferensia imprensa, iha sede Partidu Trabalhista, Akait, Sesta (26/06).

Bainhira PR Lu Olo la rezigna an, Angela dehan, RNDJ-KRDTL sei mobiliza massa hodi halo asaun pasifiku hasoru Prezidente Republika.

“Dalan atu hatun prezidente republika mak tenke mai husi povu justisa popular “People Power”. Justisa popular povu mak iha direitu, ukun ne’e pertense povu nian, ukun ne’e laos pertense ba ema ida ka rua nian, laos lider sira nian de'it maibé povu nian, enkuantu la servi povu tuir konstituisaun, povu iha direitu hamriik atu hasai fali ukun ne’e husi nai ulun sira ne’e hotu," deklara Angela.

Nia afirma, PR Lu Olo la'os prezidente ba povu maibé prezidente FRETILIN, tanba se Lu Olo nu’udar prezidente ba povu, tenke kumpre konstituisaun.

“Tanba nia eleitu ba nu’udar prezidente nia jura ba konstituisaun “cumpri e fazer cumprir”, maibé nia rasik mak viola konstituisaun, tanba ne’e tempu to'o ona Prezidente Republika tenke rezigna an,” dehan Angela.

Rate this item
(7 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.