Diretor Ezekutivu FONGTIL Daniel Santos do Carmo hatete, membru governu ne’ebé barak iha governu daualu ne’e sei fó implikasaun ba orsamentu estadu no hasa’e komplexidade dezempennamentu governasaun nian.
"Ami haree katak ne’e sei hatodan Orsamentu Jeral estadu (OJE) hodi aloka ba despeza operasional hodi finansia kamada estrutura Govemu tomak no ida ne'e sei prejudika tebes sustentabilidade Fundu Petroliferu iha future," dehan Daniel dehan liu husi konferensia imprensa iha salaun FONGTIL Kaikoli, Segunda (08/06).
Tuir Diretór FONGTIL ne’e, ukun-nain sira presiza haree no tetu didi’ak asuntu finansiamentu, tanba ho formulasaun estrutura governu ne’ebé boot seidauk bele garantia atendementu servisu públiku la’o ho efektivu no efikasia.
Daniel hatete, nu’udar sosiedade sivil preokupa, tanba tendensia halo boot esturtura governu akontese bebeik iha kada governasaun, maibe govemu kontinua la efetivu no la efisiensia.
Nia hatutan, maske membru govemu aumenta maibé realidade distansia sidadaun sira nian ho reprezenta povu nian dook ba bebeik.
“Realidade ho monitorizasaun impaktu Covid-19 nian hatudu katak membru governu sira la halo sira-nia funsaun ho di'ak no kontribui ba efetividade govenasaun”.
Ho preokupasaun hirak ne’e, FONGTIL husu ba Prezidente Republika no Govemu atu konsidera katak, tendensia aumenta numeru governu iha kada governasaun la'os solusaun ba hadi'a atendementu publiku, maibé atu satisfas de'it nesesidade politika poder nian no nune'e maneira ukun hanesan ne’e presiza hadi'a.
"Aumenta numeru governu signifika aumenta rekursu ka orsamenta estadu, politika poupansa laiha no hamenus bebeik orsamentu fundu minarai hodi benefisia de’it ineterse politiku poder nian.”