La’os ona segredu kataak, Faustino sai nu’udar kandidatu forte hodi okupa kargu Ministru Administrasaun Estatal.

Maibé, liu husi projetu rezolusaun ida ne’ebé aprezenta husi Primeiru Ministru Taur Matan Ruak, Faustino sai de’it kandidatu ba Prezidente KFP.

"KM aprova projetu rezolusaun governu ne’ebé aprezenta husi Primeiru Ministru, Taur Matan Ruak, atu nomeia fila fali Faustino Cardoso Gomes nu'udar Komisáriu no Prezidente Komisaun Funsaun Públika (KFP) ba mandatu tinan lima," informa komunikadu imprensa husi KM, Kuarta (27/05).

Atuál Prezidente KFP ne’e nia madatu sei remata iha 29 Maiu 2020, nune'e KM nomeia hikas nia hodi kontinua mandatu ba tinan lima tuir mai.

Tuir informasaun, PM deside kansela Faustino okupa kargu ministru tanba deskonfia atual Prezidente KFP ne’e iha kazu justisa relasiona ho Sena—orsamentu enkontru—bainhira sai Komisariu iha Komisaun Nasionál Eleisaun (CNE).

“Bainhira simu tiha lista kandidatu membru governu sira nian, maibé eis komisriu CNE lubuk ida mak iha kazu kona-ba deskonfia falsifikasaun Sena ne’ebé lori prejuízu ba estadu,“ informa fontes ofisial ida iha orgaun estadu ida ba www.tempotimor.com.

Entretantu tuir observasaun midia ne'e nian hafoin Primeiru Ministru Taur Matan Ruak fo sai naran atual Prezidente Komisaun Funsaun Publika ne'e nia naran atu ba hetan pozisaun hanesan Ministru Administrasaun Estatal, imediatamente Komisariu Faustino Cardoso ba kedan hasoru Primeiru Ministru no ba midia hato'o kedan ninia prontidaun atu asume pasta refere. Liu tiha loron ruma Sr. Faustino Cardoso mos hakat ba to'o gabinete Ministeiru Publiku iha Kolmera no vizita ba palasiu Prezidensial Ai Tarak Laran.

VIDEO PUBLISIDADE APELU HUSI PM TAUR APLAUS BA FRONT LINE