"Triste teb-tebes, CNRT hanesan partidu triste tebes, tanba estadu ne'e, pilar haat, kaer hela ita nia rai ka estadu, tuir ita nia tradisaun katak sai airin haat ba ita nia uma lulik Timor ne'e susar tanba nakdoko," dehan Prezidente partidu CNRT Kayrala Xanana Gusmão liuhusi konferénsia imprensa iha sede partidu CNRT bairu dos Grillus, Sábadu (23/05)
Xanana mós dehan, hanoin orgaun judisiál hamriik metin, maibé afinal nakdoko hotu.
"Ita hein katak airin justisa, airin ida ne'ebé hamriik metin, maibé justisa mós hatudu ona katak ita atu la fiat tiha fali lei," dehan Xanana.
Prezidente CNRT ne'e akresenta, respeita no hakruuk ba doutór sira iha tribunal, maibé lei iha Timor ne'e mak CNRT la fiar.
"Ami husi partidu CNRT respeita juis no doutór sira iha ne'ebá, ne'e hakruuk teb-tebes. Mais sira hatudu ba ami lei iha Timor ne'e mak ami la fiar," dehan Xanana
Husi situasaun ne'ebé akontese, mak Xanana Gusmão husu ba militante no simpatizantes CNRT nia atu hakmatek, tanba situasaun agora ne'e lei nian.
"Husu ba militante sira iha timor laran tomak katak atu hakmatek, tanba agora ne'e kestaun, ita dehan atu hatan ba kestaun ne'e katak konstituisionál ka legál ninian, la'ós ho fali manifestasaun ka saida nian fali ne'e lae," Xanana apela.
VIDEO PUBLISIDADE APELU HUSI PM TAUR APLAUS BA FRONT LINE