Tempotimor (Dili)-Partidu ne'ebé sai ona husi governu daualu ne'ebé lidera husi Primeiru Ministru (PM) Taur Matan Ruak atu halo kongresu partidu nian hodi hola parte iha governu atuál, tanba CNRT rende ona ukun ho MP Taur Matan Ruak.

 

Tuir segundu vise prezidente partidu CNRT Virgilio Smith katak, CNRT sai ona husi governu daualu, nune'e Fretilin tenke liu dalan legál.

 

"CNRT la hola parte ona VIII governu, entaun husi faktu ne'e PLP ho Khunto de'it mak mantein iha governu ne'ebé ho nia deputadu iha PN 13 de'it, ne'ebé la reprezenta maioria iha Parlamento Nasional (PN)," dehan Virgilio Smith iha sede partidu CNRT bairu dos Grillus, Segunda (11/05).

 

 

 

 

Maibe iha sorin seluk CNRT mós rekuinese, Partidu mais votadu Fretilin sei apoiu GOVERNU Taur Matan Ruak nian, tanba CNRT husu tama iha koligasaun.

 

"Hatene katak partidu istóriku FRETILIN sei fó apoiu, tanba haruka ona lista partidu nian ba membrus governu, tuir plataforma ne'ebé assina ona ho PLP, tanba ne'e Fretilin tenki tama iha Koligasaun foun ho PLP no Khunto, Tanba,  CNRT sai tiha ona husi VIII governu," dehan Smith.

 

CNRT mós husu atu labele uza Plataforma ne'ebé CNRT halo iha 2015, hodi aplika fali iha governu atuál.

 

"Plataforma de entendimentu bele funsiona hanesan governu de inkluzaun, hanesan ida ne'ebé CNRT halo iha 2015, maibé VI governu rasik iha ninia maioria parlamentar, tanba bankada FRETILIN sai nafatin opozisaun iha VI governu, tan ne’e, labele uza plataforma entendimentu hanesan dalan ida atu Fretilin tama iha governu husi odamatan kotuk,  tanba governu agora ne’e, legál no konstitusionalmente, lakon tiha ona maioria parlamentar, tanba Partidu CNRT sai tiha ona," nia tenik

 

 

 

Nia mós dehan, governu ne'ebé involve husi partidu Fretilin, la'ós ona VIII governu.

 

"Governu foun ne'ebé mai ne’e, la'ós ona VIII governu, no konstitusionalmente tenki iha representatividade legál iha PN, nune’e, partidu CNRT hein katak, iha tempu badak,  Fretilin-PLP no Khunto sei hala’o ida-idak nia konferénsia nasionál atu aprova tama iha koligasaun foun ida, ho definisaun klara  tuir artigu 9º. Lei partidus polítiku nian, ne'ebé temi tiha ona no prezidente repúblika hatene hela," Virgilio afirma.

 

Partidu CNRT mós husu, bainhira Fretilin tama iha governu tenke muda ona ba governu dasia

 

"Governu ne'ebé sei mosu, labele hanaran VIII Governu, tanba CNRT ho 21 kadeiras iha maioria parlamentar sai tiha ona, nune’e, governo foun ne’e tenki mosu husi koligasaun foun ida, atu bele sai IX governu," dehan Virgilio.

 

Nia mós akresenta, atu akontese governu dasia, mak PM Taur tenke husu demisaun nu'udar PM VIII Governu nian, hodi koligasaun husi partidu tolu bele indijita fali, para nune’e bele toma posse nu'udar PM IX governu.