Tempotimor (Dili)-Prezidente bankada Kongresu Nasionál Rekonstrusaun Timorense (CNRT) deputadu Duarte Nunes katak, iha tempu besik sei iha dalan ba Fretilin no CNRT hodi hakotu empase politika.
"Ami husu ba partidu boot rua nee, oinsa mak tuur hamutuk, tanba sira mak responsabilidade boot liu, agora povu fó fiar ba sira, sira la halo, sira husu ba kiik oan sira ne'e atu halo nusa?, entaun ida ne'e mak ami nia hanoin katak, tempu ona, partidu boot rua ne'e hamutuk hodi hakotu empase polítika rai laran," dehan Prezidente Bankada Parlamentár CNRT Duarte Nunes iha salaun bankada CNRT nian, Tersa (05/05)
Nia dehan, di'ak liu partidu boot rua ne'e mak hamutuk hodi hakotu empase polítika.
"Di'ak liu boot sira hamutuk para rezolve problema ne'e, agora ita hamutuk ho kiik sira ne'e horsida hamriik ho ida, aban nia hamriik iha sorin, mais ita haluhan tiha katak povu fó fiar ba ita atu rezolve problema," dehan Duarte
Duarte mós lahatene katak, Fretilin ho CNRT mak bele hakotu empase polítika, maibé sira iha responsabilidade.
VIDEO PUBLISIDADE APELU HUSI PM TAUR APLAUS BA FRONT LINE
"Signifika só Fretilin ho CNRT de'it mak hakotu empase polítika ne'e? Ha'u la hatete ida ne'e, maibé ami ko'alia tanba sira iha responsabilidade no garante ba povu, povu fó fiar ba sira, entaun tuur hamutuk para buka solusaun, entaun ita hein katak iha tempu badak ita sei hetan solusaun ba ida ne'e," dehan Duarte
Nia dehan, posibilidade ka lae, maibé partidu rua ne'e hamutuk iha votus 44.
"Bankada nia obrigasaun hato'o ba partidu rua ne'e, se partidu tolu mak nia votus barak liu, ami ko'alia ba sira, mais boot rua ne'e hamutuk 44 ona," nia afirma
Xefe bankada ne'e afirma, atu partidu seluk rona ka la rona ne'e, ami la preokupa, maibé partidu boot rua nee iha obrigasaun atu buka solusaun," nia dehan
Hatán ba ezijensia bankada CNRT nian ne'e, prezidente bankada Fretilin Aniceto Longunhos Guterres katak, Fretilin seidauk iha orientasaun.
"Ha'u hanesan xefe bankada lakohi ko'alia kona-ba ida ne'e, sa tán CNRT foin lansa, ne'ebé ha'u mós vise prezidente Fretilin ne'ebé to'o agora laiha kontaktu ruma. Mais bainhira partidu deside ona, ami tuir, maibé seidauk, ami labele komenta sasan sira hanesan ne'e, ne'ebé hein de'it lideransa partidu," dehan Aniceto.
PUBLISIDADE
