Prezidente Bankada PLP Francisco de Vasconcelhos hatete, enkontru semanal ba lider bankada sira laiha tanba Prezidente PN mak kansela.
"Ha'u haree enkontru semana hira ne'e laiha, ohin ajenda plenária mós laiha, ne'e sinal la di'ak, tenke funsiona Parlamentu Nasionál. Loloos ne'e reuniaun lider bankada iha semana kotuk iha, maibé prezidente (PN) mak kansela,” dehan Prezidente Bankada PLP iha PN, Segunda (04/05).
Hatan ba deklarasaun ne’e, Vise Xefe Bankada CNRT Patrocino dos Reis hatete, molok ne’e iha ona desizaun husi lider bankada katak bainhira laiha periodu odem do dia, laiha plenaria.
VIDEO PUBLISIDADE APELU HUSI PM TAUR APLAUS BA FRONT LINE
"Tanba ita iha situasaun Covid-19, entaun ema atu halo prevensaun, entaun buat sira ne'e hotu deside ona katak bainhira laiha periodu ordem do dia, entaun laiha plenária, tanba ne'e mak ohin laiha ordem do dia, entaun plenária laiha, ne'e desizaun lider bankada nian," dehan Patrocino.
Tuir nia, tanba iha semana kotuk laiha reuniaun lider bankada nune’e iha Segunda horseik laiha plenária.
Maske laiha plenaria, tuir nia, sei la fó impaktu ba funsionamentu PN.
"La fó impaktu ba funsionamentu Parlamentu Nasionál, ne'ebé estadu emerjénsia hotu tiha lai mak ita haree fali ba ajenda sira ba oin," katak nia.
Entretantu, jornalista www.tempotimor.com koko atu halo konfirmasaun ho Prezidente PN Arão Noe, maibé nia foti liman de’it ba jornalista sira no hakat daudauk ba nia karreta laran.
PUBLISIDADE
