Tuir Pe. Crispim, solusaun atu hakotu impase politika mak troka kompozisaun meza Parlamentu Nasionál no indizita fila fali Taur Matan Ruak sai Primeiru Ministru ba governu dasia.

Nia dehan, partidu politiku rua, PLP no FRETILIN, ne'ebé halo ona plataforma intendimentu presiza halo movimentu iha PN hodi troka kompozisaun meza PN atu nune'e demite governu daualu, hafoin indizita fila fila Taur Matan Ruak ba PM.

Tanba tuir nia, impase politika ne'e so bele hotu bainhira iha governu foun, atu estadu Timor-Leste iha fali Orsamentu Jeral Estadu.

"Ha'u-nia sensieridade relasiona ho sentidu estadu ida ne'e mak partidu tolu hanesan PLP-Fretilin i KHUNTO iha ona plataforma intendementu, dalan lais liu mak iha Parlamentu Nasional tenke halo mudansa ba kompozisaun meza pois governu atual halo demisaun nune'e kontinua kedas indizita fali maun Taur ba Primeiru Ministru atu nune'e rezolve problema politika i orsamentu jeral estadu, nune'e buat hotu lao tuir Lei," dehan Pé. Crispim ba www.tempotimor.com via telemóvel, Sesta (01/05).

VIDEO PUBLISIDADE APELU HUSI PM TAUR APLAUS BA FRONT LINE

Tanba, tuir nia, bainhira governu daualu kontinua eziste, Timor-Leste sei laiha orsamentu jeral estadu ba tinan 2020 to'o 2021, tuir K-RDTL artigu 97 kona-ba "inisiativas Lei nian".

Pe. Crispin dehan, bainhira OJE xumba iha PN, dalan uniku mak eleisaun antesipada, maibé ne'e la aplika, entaun dalan mak demisaun governu tuir artigu 97 númeru 5.

"Tanba ne'e mak Prezidente Repúblika uza nia kompetensia tuir artigu 74 K-RDTL, bolu hamutuk entidade hotu katak eleisaun antesipada mak dalan ikus i husu partidu politiku sira movimentu iha Parlamentu Nasional halo demisaun ba governu tuir artigu 112, bainhira iha ona governu foun, tuir artigu 106 governu bele hatama fali programa i proposta OJE foun."

Maibé, nia hatutan, bainhira governu daualu mantein, tuir Pe. Crispim, sei aumenta problema ne'ebé molok ne'e iha no la rezolve OJE.

"Tanba artigu 97 númeru 4 K-RDTL hatete katak 'proposta Lei ne'ebé la votada iha Parlamentu Nasional labele hatama fali iha sesaun legislativa tuir mai'. Ne'e katak, sesaun lejislativa ne'ebé prepara ba OJE 2020 i 2021 labele hatama, so sesaun legislativa ne'ebé prepara ba 2022 mak bele hatama fali.

Signifika, nia esplika, iha 2020 to'o 2021 sei laiha OJE tanba artigu 97 númeru 4 ne'ebé provide atu governu hatama fali proposta Lei ne'ebé la votada iha Parlamentu Nasional.

"Diferente husi artigu 97 númeru 3 kuandu proposta lei ne'e rezeitada, mais ita-nia kazu mak proposta Lei la votada iha Parlamentu Nasional," dehan Pé. Crispim.

PUBLISIDADE