Iha 8 Abril 2020, PM Taur deklara ba publiku katak nia hasoru PR Lu Olo hodi husu atu retira nia pedidu demisaun ne'ebé entrega ba PR iha 24 Fevereiru liu ba.
Ikus mai, liu husi komunikadu imprensa ne'ebé www.tempotimor.com asesu iha Kuarta (15/04), PR Lu Olo deklara aseita ho pedidu PM hodi retira ninia karta demisaun.
"Ohin, Prezidente Repúblika haruka ona karta ba Primeiru Ministru katak aseita Primeiru Ministru dada-sai karta pedidu demisaun ne’e," hakerek karta komunikadu husi Kaza Sivil Prezidensial Nicolau Lobato.
Karta ne'e esplika, tuir artigu 112°, alínea b, Konstituisaun RDTL, kompete ba Prezidente Repúblika simu ka la simu pedidu demisaun husi Primeiru Ministru. Kompete mós ba Prezidente Repúblika, aseita ka lae pedidu dada-sai pedidu demisaun husi Primeiru-Ministru, bainhira Prezidente Repúblika seidauk foti desizaun kona-ba pedidu demisaun.
"Liu husi karta ne’e, Prezidente Repúblika reafirma katak Primeiru Ministru sei hala’o nafatin ninia knaar baibain ho efeitu konstitusional no legál hotu-hotu."
PR Lu Olo hatete mós katak sei fó kolaborasaun institusional ne’ebé presiza atu Primeiru Ministru bele hala’o ninia mandatu nu’udar Xefe Ezekutivu, atu asegura funsionamentu regular VIII Governu Konstitusional, tuir Konstituisaun RDTL.