Tuir senariu husi SIJK, Covid-19 sei afeta ba Timor-oan na'in 13.000.

Koordenadór Estadu Maior Konjuntu SIJK, Kapitaun Mar-Guerra Donaciano Gomes "Pedro Klamar Fuik" hatete, Primeiru Ministru Taur Matan Ruak orienta SIJK atu halo estudu ba senariu aat liu Covid-19 iha TL.

"Hanesan ohin Primeiru Ministru (PM) halo ona senáriu, ne'ebé orienta ami hodi halo estudu ba pior senáriu nian, katak virus corona mak da'et ona ba sidadaun lokál mak SIJK opta pursentu ida husi povu Timor-Leste infetadu ba Covid-19," dehan Pedro Klamar Fuik iha plenária Parlamentu Nasionál (PN), Kinta (16/04).

Tuir nia, senariu aat liu ne'ebé SIJK halo estudu mak Covid-19 afeita ona porsentu 20 husi total populasaun Timor-Leste.

"Se ita-nia populasaun iha millaun 1.3, ita opta ba pursentu ida mak infetadu, signifika ita iha rihun 13 infetadu. Husi infetadu ne'e, ita konsidera pursentu 40 ba kazu lijeiru hamutuk 5200 infetadu, 40% ba kazu moderadu hamutuk 5200 infetadu, 15% kazu grave no 5% ba kazu grave iha respiratóriu," nia esplika.

Atu bele halo tratamentu ba ema afetadu Covid-19 iha senariu aat ne'e, nia dehan, presiza ventiladór 2.600.

"Kazu grave no kazu grave ba respiratóriu ne'ebé presiza par apoiu sira par bele moris mak ita presiza ventiladór 2.600," dehan Pedro Klamar Fuik.

Ho estimasaun ba senariu ne'e, nia dehan, Timor-Leste tenke prepara mós 390 óbitas.