KHUNTO Deskorda Ho AMP Ne'ebe Halo Mosaun Sensura Ba PM

Deputadu Bankada KHUNTO Luis Roberto da silva ko'alia ba jornalista sira iha parlamentu Nasional iha momentu ruma kotuk Deputadu Bankada KHUNTO Luis Roberto da silva ko'alia ba jornalista sira iha parlamentu Nasional iha momentu ruma kotuk Foto File

Tempotimor (Dili)- Deputadu bankada partidu Klibur Haburas Unidade Nasional Timor Oan (KHUNTO) Luis Roberto hatete, la konkorda Aliansa Maioria Parlamentar (AMP) atu foti desizaun aprezenta mosaun sensura kontra Primeiru Ministru (PM) Taur Matan Ruak.

"Hau la konkorda ho desizaun ida dehan atu halo mosaun sensura (Kontra PM Taur), AMP nia ema iha membru Oitavu governu rezigna an no halo demostrasaun hasoru prezidente Republika,” dehan Deputadu Bankada KHUNTO, Luis Roberto Da silva, iha resinto Parlamentu Nasional, Segunda (6/4).

Luis Argumenta katak Xefe governu ida bele halo evaluasaun ba nia membru rasik nune’e iha dalan para atu rezolve.

Nune’e nia hateten, “la'os dalan mak Mosaun Sensura, manifestasaun no rezigna an mak hakotu impase politika, ne'e, lae”.

Deputadu bankada ne'e konsidera ezonerasaun ba Eis Vise Minisrta Saude (MS) Elia dos Reis Amaral, la influensia membru governu sira husi KHUNTO atu rezigna a’an.

“Tanba de'it Xefe governu hasai nia Estaf ida depois partidu hotu-hotu ne'ebe involve an iha governu fo fila fali ninia solidariedade hodi hotu-hotu rezegna an, ne'e politika lalos no laklaru", Nia esplika

Vice Prezidente Parlamentu nasional ne'e afirma, maske Primeiru Ministru hasai Ministra Saude Interina Elia dos Reis Amaral husi ninia kargu, maibe Pozisaun KHUNTO mantein nafatin ninia membru sira ne'ebe asumi kargu iha Oitavu governu hodi hala'o servisu hanesan bai-bain.

"Ba ami partidu KHUNTO la konkorda ho AMP ne'ebe hala'o enkontru iha rezidensia prezidente partidu CNRT Kay Rala Xanana Gusmao hodi foti desizaun mesak par fo solusaun ne'e ami la konkorda, atu konkorda bainhira tur hamutuk, kuandu bolu de'it ida rua ba tur hamutuk mak foti desizaun, ne'e dehan katak, la'os desizaun koletivu", Nia hakotu

Rate this item
(9 votes)
Last modified on Monday, 06 April 2020 11:26
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com