Ministra Elia hatete, pasiente Covid-19 ne'e hatudu progresu ne'ebé avansadu tebtebes no daudauk ne'e iha kondisaun ne'ebé di'ak.

"Ita grasas a Deus tanba nia iha avansadu tebtebes, nia di'ak, bele halo atividade normál," dehan Ministra Elia iha Sentru Konvensaun Dili, Sabadu (28/03).

Ho progresu ne'e, Elia hein katak bainhira hala'o tan teste no hatudu rezultadu negativu, signifika nia livre ona husi Covid-19.

"Se ita hasai tan teste ba nia mak rezultadu negativu, nia liberta ona husi corona virus," dehan Elia.

Entretantu, iha 21 Marsu 2020, Ministra Saúde anunsia katak bazeia ba rezultadu teste hatudu katak iha ema estranjeiru ida iha Timor-Leste ne'ebé pozitivu Covid-19.

Ministra Saúde interina, Elia liu husi konferensia imprensa informa, ema ne'ebé pozitivu Covid-19 daudauk ne'e izola iha fatin adekuadu saúde nian no hetan monitorizasaun husi departamentu vizilansia MS.

Tuir Elia, maske iha ona pozitivu Covid-19 maibé la fó risku boot ba públiku tanba ema ne'e kopera di'ak ho pesoal saúde sira bainhira nia sente moras ho sintomas Covid-19.

"Nia rasik izola an kedas hafoin kontaktu pesoal saúde," dehan Elia iha edifisiu MS, Kaikoli, Sabadu (21/03).