Molok ne'e, Primeiru Ministru Taur Matan Ruak deklara katak, governu hasoru hela difikuldade orsamentu, nune'e hato'o ona pedidu ida ba PN hodi bele aprova.
PM Taur dehan, governu haruka ona proposta alterasaun lei orsamentu jestaun finanseiru ba Parlamentu Nasional atu bele aprova hodi fó dalan ba governu atu bele selu kompromisiu sira iha rai laran no rai li'ur ne'ebé iha sistema orsamentu duadesimal labele halo.
"Ha’u espera no ha’u husu par Parlamentu Nasional husi bankada hotu-hotu fó sira-nia apoiu ba alterasaun lei ne’e," dehan PM Taur iha Sede Suku Santa Kruz, Tersa (17/03).
Iha Kinta (19/03), Prezidente Parlamentu Nasionál Arão Noe hatete, iha enkontru lider bankada haree asuntu balun importante tan ne'e ajenda ona pedidu governu nian ba Segunda (23/03).
"Ohin iha enkontru lider bankada par haree ba ajenda semana oin mai, haree ba asuntu balun ne'ebé importante tebes mak Segunda-feira haree ba debate pedidu urjensia ne'ebé governu aprezeta mai kona-ba alterasaun lei orsamentu jestaun finanseira," dehan Arão iha PN.
Bainhira hetan aprovasaun iha Segunda, nia dehan, iha Tersa bele konklui ona.
Hatan kona-ba iha garantia pedidu ne'e hetan aprovasaun, Arão dehan, "Ha'u lakohi komenta kona-ba buat ne'ebé kompetensia plenaria nian, so ko'alia de'it prosesu, prosedimentu, kona-ba desizaun ne'e kompetensia bankada no deputadu idaidak nian," dehan nia.
Entretantu, relasiona ho situasaun balun hanesan inundasaun no ameasa husi Covid-19, komunidade sira husu ba governu atu halo intervensaun lalais.
Komunidade Bekusse, D.A. da Costa husu ba governu atu halo lalais intervensaun hodi hamoos restu husi inundasaun ne'ebé mosu iha semana kotuk.
“Ami husu governu ho urijentemente fó apoia hodi tulun ami hadia fali ami-nia uma,” dehan nia iha nia hela fatin.
Iha fatin ketak, komunidade Bidau, M. N. da Silva lamenta, bainhira mosu dezastre iha nasaun balun, estadu TL ho lalais aprova osan hodi fó apoiu, maibé bainhira kazu ne'e mosu iha sira-nia inus-okos sira serbisu hanesan lenuk.
“Fó apoiu solidariedade ba nasaun seluk kuandu mosu dezastre lais loos. Maibé mai nia povu rasik, politiku sira dada-malu no politiza tuun-sa’e," lamenta nia.
Komunidade seluk, Beny M. konsidera deputadu sira iha PN halimar ho povu no nasaun nia vida tanba konsidera la fó prioridade ba asuntu emerjensia ne'ebé presiza atende ho lalais.
"Tanba saida mak Sesta ne'e sira labele diskuti, tenke ba Segunda?, Agora ita hasoru hela situasaun emerjensia no governu laiha osan natoon atu halo asaun, deputadu sira tenke serbisu lalais, labele halimar ho povu ne'e nia vida," deklara Beny.
