Tanba ne’e, iha loron Segunda (9/3), komunidade sira iha Tibar konsege halo asaun protesta hodi kontra polítika Governu nian atu lori suspeitu sira ba fatin ne’e.

Hafoin akontesimentu ne’e, Komandante Jerál Polisia Nasionál Timor-Leste (PNTL), Komisáriu Faustino da Costa, bolu responsabilidade na’in haat husi komunidade Tibar ne'ebé rejeita planu governu nian hodi husu razaun husi protesta ne’e.

"Iha protestu makaas tebes husi komunidade, entaun polisia foti sira-nia ema na’in haat para ba halo identifikasaun kona-ba sira protesta ne'e razaun saida", dehan Faustino, hafoin hasoru-malu ho Primeiru ministru, Taur Matan Ruak, iha Palásiu Governu, Segunda (9/3).

Komandante Jerál PNTL afirma, soru-mutu ho Xefe Governu atu informa ba kona-ba komunidade Tibar nia protestu ba fatin ne'ebé governu indika ona atu halo fatin kuarentena ba suspeitu Corona Virus.

Nia hatutan, tanba planu ne'e governu mós hasai ona rezolusaun ida, nune'e informa ba Primeiru Ministru katak, haruka ona polisia tantu komandu munisípiu para asegura.

Nune'e, dezde governu dekreta katak iha Tibar maka atu prepara ka harii ba fatin izolamentu, entaun PNTL mós tenke asegura. (*)