Tuir xefe suku Fahilebu, Marcelino da Cruz katak, suku Fahilebu besik sidade Dili, maibé to'o agora eletrisidade seidauk tama.

"Ha'u-nia suku rasik ne'e to'o agora eletrisidade seidauk tama, ha'u-nia suku ne'e besik hela kapitál Dili inklui besik munisípiu Ermera, maibé liña eletrisidade to'o oras ne'e seidauk asesu," dehan Xefe suku Fahilebu iha CCD, Segunda (21/12).

Nia mós dehan, alende husi liña eletrisidade ne'ebé seidauk tama, estrada mós kontinua aat, tanba tempu udan ne'e, susar loos.

"Bee-moos iha suku ne'ebá sufisiénte, tanba seku ne'ebá servisu hamutuk ho PNDS, maibé estada mak kada tinan ne'e, udan-been mai ne'e ke'e hotu, entaun kareta públiku sira liu mós ladi'ak," nia dehan.

Suku Fahilebu iha produtu lokál ne'ebé lori reseita ba sira mak kafé, maibé dadaun ne'e kafé menus, entaun autoriedade lokál aviza ba komunidade sira kada ida-idak atu kuda maek, nune'e bele ajuda kafé.

Entretantu, suku Fahilebu iha nia populasaun hamutuk 1.674 ne'ebé mai husi uma-ka'in 320. (*)