Iha parlamentu nasional tersa feira (23/10/2018) ne’e deputadu/a husi bankada governu AMP ne’ebé kompostu husi Partidu Libertasaun Popular (PLP), Partidu Congresu Nasionál ReconstruçãoTimorense (CNRT) no Partidu Kmanek Haburas Unidad e Nasionál Timor Oan (KHUNTO) vota kontra dala ida tán viazem prezidente da republika ba indonezia hodi partisipa iha Bali Forum.
Pedidu viazem prezidente da repúblika Francisco Guterres “Lu-Olo” ba Indonézia ne’ebé bankada do governu kansela mak “As sentimento à deslocação de sua Exelência o Presidente da Republica à República da Indonesia de 28 de outubro a 1 de novembro”.
Rezultadu votus husi deputadu sira bankada neen iha parlamentu nasional totál votus afavór sanulu-resin-sia, kontra tolunulu-resin-ida abstensaun zero. Husi rezultadu votasaun ne’e deputadu bankada opozisaun Fretilin PD sente triste ho desizaun politika ne’ebé la’o iha parlamentu nasional.
Deputadu bankada opozisaun PD Adriano do Nascimento espresa, “Ita halo kanselamentu ba viazem Prezidente da Republika nia dala tolu tui-tuir malu, eh ema ne’ebé númeru um (nú. 10 iha Timor Leste). Maibé orgaun soberanu hanesan prezidente PN viazem ba liu ho livre/avontade”.
Reprezenta povu ne’e komenta, desizaun sira ne’ebé iha parlamentu ne’e ladún di’ak ba povu no nasaun ida ne’e, tanba ita kria hela ábitu (sistema) ne’ebé sei lori komplikadu ba jerasaun foun sira tuir mai.
Entertantu deputadu bankada Fretilin Antoninho Bianco mós halo deklarasaun de votus katak, “sentimentu odiu ba Fretilin no lidé istóriku ha’u foin sente agora. Ema ne’ebé odiu Xefi Estadu iha rai ida ne’e foin akontese eh iha mundu tomak foin akontese iha Timor”. (Oli)
