"Maun Boot balun dalaruma ko'alia arbiru, dehan fali impase polítika nia-hún ne'e husi ne'ebá (Prezidente Repúblika). Nusa la dehan impase polítika nia-hún ida mak Ó (Maun Boot balun)", dehan Deputadu David Dias Ximenes 'Mandati', iha Uma Fukun PN, Sesta (31/1).

Nia dehan, bainhira Maun Boot sira hatene hún husi impase polítika ne'e tanbasá la buka tuur hamutuk hodi rezolve, maibé buka fali pozisaun hodi ko'alia tuun-sa'e de'it iha li'ur.

"Ha'u lakohi dehan sira nia-naran, maibé husu Maun Boot sira hotu-hotu konxiénsia", dehan Mandati.

Tuir David, atu solusiona problema buka malu ko'alia, presiza aprende ko'alia ba malu atu haree ba moris di'ak povu nian.

"Karik ema ruma ne'ebé lakohi diálogu ne'e dalaruma problema nia-hún iha ne'ebá mak lakohi diálogu, depois aumenta ba aumenta buat problema naruk ba beibeik de'it", tenik nia.

Nune'e, solusiona ba impase ne'e husu ida-idak nia konxiénsia, la presiza buka mediadór, tanba rai ne'e rezultadu husi matebian, kosar-been, ruin no raan.

Antes ne'e, eis-Prezidente Repúblika, José Ramos Horta hateten, problema iha governu AMP hahú bainhira Prezidente Repúblika, Francisco Guterres Lú Olo, deside hodi pendente membru governu na'in sia (9).

"Primeiru problema ida maka iha Palásiu Ai-Tarak Laran (Palásiu Prezidensiál, Bairru-Pité), ne'ebé ke Prezidente (Repúblika) lakohi fó pose ba elementu balun, elementu importante xave CNRT nian," dehan Ramos Horta, iha knaar fatin, Faról-Dili, foin lalais nee. (*)