"Orsamentu Jerál Estadu la passa maibé Taur Matan Ruak kontinua nafatin nu’udar Primeiru Ministru VIII Governu Konstitusionál ho ninian kompeténsia tomak ne’ebé lejítimu no plenu", dehan nia, liuhusi komunikadu ne'ebé www.tempotimor.com asesu, Kinta (23/1).
Tuir artigu 74 Konstituisaun Prezidente Repúblika mak Xefe Estadu, símbulu no garantia ba indepedénsia nasionál no unidade Estadu, funsionamentu regulár institusaun demokrátiku sira.
Ne'e duni, ronda diálogu ne’e hala’o atu rona solusaun konkretu atu hakotu impase ne’e husi dirijente partidu polítiku no xefe bankada.
Prezidente Repúblika, Francisco Guterres Lú Olo, ohin, hahú rona solusoins polítika ba situasaun polítika-konstitusionál atuál husi dirijente partidu polítiku no xefe bankada Congreso Nacionál de Reconstrução de Timor-Leste (CNRT), Klibur Haburas Unidade Timor Oan (KHUNTO) no koligasaun Frente Mudansa/ União Democrática Timorense (UDT).
Prezidente Repúblika informa ba dirijente partidu polítiku no xefe bankada sira katak, hafoin OJE 2020 la pasa, presiza Timoroan hotu nia unidade atu hakotu situasaun polítika ne’e atu labele hada'et liután ba beibeik.
"Situasaun polítika ne’ebé ohin loron Timor-Leste enfrenta nu’udar problema ita hotu ninian. Tanba ne’e, ema hotu-hotu nia hanoin sei kontribui ba solusaun", dehan nia.
Prezidente Repúblika fiar katak, laiha partidu polítiku ida mak iha intensaun aat ba nasaun ida ne’e no Timoroan hotu-hotu serve ba rai ida ne’e.