Hanesan Tempotimor.com públika ona antes, governu daualu ne’ebé lidera husi Primeiru Ministru Taur Matan Ruak “fó serbisu” ba asesor nasional no internasional na’in 1.014. Asesor nasional hetan vensimentu husi $5.000 to’o $7.000 kada fulan. Enkuantu asesor internasional simu salariu husi $10.000 to’o $21.000 kada fulan.
Relasiona ho ida ne’e, Bankada opozisaun iha Parlamentu Nasionál (PN) tuur akompaña de’it tanba konsidera kestaun ne’ebé loloos “sai serbisu” opozisaun nian bankada apoiu governu “hada’u” ona.
"Kona-ba lista asesór ha'u mós lee de'it iha facebook katak deputada Virgina Ana Belo husi bankada Aliansa Mudansa ba Progresu (AMP) nia hakfodak haree lista asesór nian, entaun ami opozisaun nia parte iha ne'ebé? se sira na'in mak halo tiha depois sira hakfodak fali, ne'e ami atu hasee husi ne'ebé?, ha'u la hatene atu ko'alia saida," dehan deputadu bankada Partidu Demokratiku (PD), Adriano do Nascimento iha PN, Kinta (14/11/19).
Deputadu ne’e konfuzaun ho koligasaun Aliansa Mudansa ba Progresu tanba bainhira to’o ona iha PN mak sira hakfodak no kritika.
"Koligasaun ida agora ne'e mai iha Parlamentu (Nasionál) mak hurlele malu fali, hakfodak ba la loos ka krítika. Ne'ebé ami konfuzaun, PD ho Fretilin atu ko'alia saida tan, ami kala sita de'it ona sira-nia lia-fuan hodi husu fali," nia komenta.
Adriano afirma, nu’udar opozisaun nia parte la hatene loos atu koalia tan saida ba asuntu refere tanba AMP mak hakilar malu fali.
“Atu ko'alia saida tan, husi AMP nia uma laran mak hakfodak ona no hakilar ona, entaun ami rona de'it. PD ho Fretilin iha li'ur de'it," dehan nia.