Tempotimor (Dili)-Estrada públiku diresaun husi Dili ba Munisípiu Ermera no Likisa iha parte Tibar ameasadu atu kotu bainhira udan boot mai.
Tanba ne’e, Xefe Suku Tibar, Bento Correia da Conceição husu ba Ministériu Obras Públikas atu hadi’a ho urjente, tanba besik tinan rua seidauk halo reabilitsaun.
"Dalan ida ba Dili Likisa Ermera ne'e la'ós dalan suku nian, ne'e dalan nasionál agora husi dia 04 Abríl, to'o agora la hadi’a, agora iha leten ne'e atu kotu ona se udan mai agora nia kotu tan", dehan nia iha Tibar, kinta (17/11).
Tanba, governu la hadi’a lalais, udan kuandu tun mak dalan ne’e kotu sei difikulta agrikultór sira atu transporta produtu ba Dili.
"Estrada ne'e urjenti, tanba udan Kooperativa lori nia kafé mai Dili mós la di'ak, ami husu tinan ne'e, orsamentu sai tenke halo kompletu kedas ida, tanba udan agora atu mai", nia husu. (*)
