"Ami ko'alia hotu-hotu konkorda ho ha'u-nia proposta, e Prezidente mos konkorda ho ha'u-nia proposta ne'ebé ha'u fó ba nia, e nia sei lori ba Portugál, atu ajuda fó solusaun ida ke temporaria, depois to'o hahú prosesu ida ke bele fó solusaun permanente", dehan Alkatiri iha palasiu prezidensial, Bairo Pite, sexta (28/10).
Tanba, situasaun ne'ebe afeta ba timoroan sira iha portugal, balun toba de'it iha jardin no iha tempu rai malirin bele fó susar liutan ba sira, entaun preokupasaun boot ida-ne'e mak hato'o ba Prezidente Repúblika.
Nune'e, iha loron (29/10), Prezidente Repúblika ba Portugal karik, bele haree liliu preokupasun husi sidadaun timoroan sira nian.
"Preokupasaun mak sidadaun ne'ebé kontinua ba de'it, ba de'it Portugal ne'e boot tebes, entaun ha'u mai para hamutuk ho señor Prezidente, fó ha'u nia opiniaun atu rezolve buka solusaun ne'e halo nusa, ne'e mak ha'u husu atu ko'alia molok nia atu ba portugal", nia afirma
Ne'e duni, proposta opiniaun ne'ebé hato'o ba prezidente repúblika, sei lori hodi ko'alia ho governu portugal atu buka solusaun, liliu kria kondisaun ba timoroan sira atu aproveita mos oportunidade formasaun portugez ba sira, nomos fasilita sira atu servisu.
"Kria kondisaun ba sira liliu aprende buat ruma iha portugal, hahú ho lingua portugeza e sira-nia servisu ruma ne'ebé sira hakarak halo, mais iha ne'eba sira tenke iha tiha oportunidade para hetan treinu ba buat ida", nia dehan
Nune'e mos, ba timoroan sira ne'ebe atu ba Portugal, tenke hetan uluk treinamentu hanesan lingua, fiziku, profesionalismu, hanesan akordu ne'ebé Timor-Leste halo ho Korea Súl.
"Hotu-hotu iha diretu atu ba ne'ebé de'it, mais labele ba iha ema-nia rai atu sai fali refuziadu, ba atu kontribui, lori sira-nia kbi'it, sira-nia kapasidade atu hatudu katak, ita mos iha talentu, se mak hakarak ba halo múzika bele halo múzika", nia subliña
Maibé, kestaun seluk ne'ebe iha mak, Estadu Timor tenke trava ona ajensia ilegal sira, atu reduz trava sirkulasaun trafiku ilegal, trafiku umanu, hodi halo ema sai vítima.
Tanba, ajensia ilegal balun husu osan selu (dua-kali-lipat), 100 pursentu, purzemplu loloos sira husu mak US$3 mil dolar, maibé husu kedas fali US$6 mil dolares, ne'e atu oho ema seluk, entaun autoridade tenke hapara.
"Ha'u hanoin la'os lobi politiku ba portugal, buat ne'e sira atu ba ne'ebá, ita lahatene ba barbarak, kuandu ha'u ba ne'eba, la'os ba asuntu ida-ne'e, mais ha'u preokupa ho joven sira-ne'e, eh ha'u buka ko'alia ho autoridade portugal sira liliu ho Prezidente Repúblika, ne'e mak komesa book, mais ha'u kontinua preokupa, horseik de'it ba atus-ida resin ka atus-rua, ne'e nafatin susar tebes", nia hakotu. (*)