“Ha’u hanoin liga ho kazu joven ida ne'ebe mate iha sela Polisia nomós padre Abeto nia mate, família sira iha direitu tomak atu husu ba Tribunal hodi fo justisa no lialoos, karik vítima sira husu no tribunal deklara katak, kazu ne'e investigadu ema ne'e mate tanba ida-ne'e mak halo mate, faktu los, testamunia provadu maka lei sei orienta ita, tanba ne'e direitu mak familia matebian sira tenke ba husu iha tribunal, liu husi Ministeriu Públiku,” dehan Deputadu Joaquim iha Parlamentu Nasional, tersa (18/10).
Tanba, kazu hanesan padre Abeto, ne’ebé mate derepente hafoin viajen ba Dare no joven ida mate iha sela polísia ho kondisaun tara-an hela ne'e, presiza provas tuir atu deside tuir lei ne'ebé vigora.
Nia fó ezemplu, joven ne'ebé mate iha sela polisia laran ne'e, maizumenus iha provas kona-ba sira nia-oan sai husi uma ne'e moras ka la'e, no nia mate tara-aan ne'e nia maka tara-aan duni ka ema ruma mak oho depois lori ba tara ne'e, tenke iha provas.
Tanba ne'e, tenke husu ba Ministeriu Públiku atu autoriza investigasaun kriminál, ho nune'e bele iha rezultadu ne'ebe di'ak hodi lori ba Tribunal, ho rezultadu autopsia ida la'os loke iha família nia oin, maibé prosesu autopsia ne'e ba loke iha tribunal.
Deputadu Bankada CNRT, Patrocino Fernandes hatete, aktu krime sira ne'ebe mak akontese ona ne'e kompetensia tomak iha Ministeriu Públiku nia liman, atu estuda ninia prosesu ne'e lao halo nusa.
Hein katak, problema sira hanesan ne'e, labele mate de'it iha dalan klaran, tanba família vítima sira hein hela justisa no hein hela estadu atu fó justisa ne'ebe loloos ba povu sira.
"Tan ne’e, papel media mós importante tebes atu fó sai nafatin informasaun kona-ba kazu sira ne'e, ninia andamentu ne'e to'o iha ne'ebe,” dehan nia.
Sorin seluk, Deputadu bankada PD, António da Conc eição mos husu ba autor judisiáriu sira hanesan Ministériu Públiku ho Tribunal atu lori justisa ba povu ho lalais, tanba povu labele hein to'o kleur. (*)