Durante iha prosesu Enseramentu, Ministru Francisco hato'o agradese ba administradór munisípiu no entidade hotu iha Lautém, tanba bele simu programa ida ne'e.
Nune'e, hato'o mos parabens ba Formandu na'in 12 ne'ebe tuir ona formasaun durante loron lima.
“Ha’u hatene imi sei saudades atu kontinua aprende, maibé programa ne'e ba loron lima de'it, tanba ne'e parabens ba formandus sira, ita sei kontinua iha tempu seluk," dehan nia hafoin hala'o enseramentu formasaun iha munisípiu Lautém, sesta (16/09).
Formandu sira mos hakarak atu tuir nafatin, maibé programa ne'e nia durasaun ba loron lima de'it, entaun hein fali tempu seluk.
Tanba, oitavu governu konstitusionál komprimitidu atu halo dezentralizasaun kna’ar ba Munisípiu sira ho seriedade, tanba ne'e ministeriu sira mós tenki hahú desentraliza ona knaar sira ne'e mai munisípiu liu husi formasaun atu bainhira kna’ar ne'e to'o ona iha Munisípiu sira, funsionariu ida-idak bele hala'o ona kna’ar ne'e tuir-nia kapasidade ho kompetensia.
Tanba ne'e, formasaun hirak ne'e, sei simu hotu sertifikadu husi INDIMO, la'os ida-ne'e mak sai objetivu, maibé oinsá mak entidade sira estadu nian bele iha koñesimemtu hodi bele kria rasik portál hodi bele fahe informasaun kona-ba atividade hotu ne'ebé entidade estadu sira hala'o, hodi komunidade sira mós bele hatene.
Husu ba formandu sira atu kontinua lee nafatin módulu ne'ebé iha, halo nafatin peskiza liu husi internet, atu-bele adapta no kapasita-an ho situasaun real ohin loron liu liu iha mundu digital.
Administradór munisípiu Lautém, Domingos Savio, hatete, lori formandu no funsionáriu tomak hato'o agradese ba Ministru MAPKOMS ho ekipa tomak ne'ebé bele mai to'o iha Munisípiu Lautém.
Husu nafatin atu formasaun ne'e bele kontinua atu funsionáriu sira bele iha ona koñesimemtu karik ba oin kria portal munisípiu, sira hatene ona saida maka presiza halo.
Husi formasaun Multimedia no media sosiál ne'e, partisipa husi funsionáriu hamutuk na-in 12 husi diresaun sira iha Munisípiu Lautém nian, durante loron lima.
Enseramentu ne’e, partisipa husi Xefe gabineti MAPKOMS, Xefe gabinete Asuntus parlamentár, kargu Xefia MAPKOMS, reprezentante Komandante PNTL munisípiu Lautém no mós funsionáriu Administrasaun Lautém. (*)
