“Konserteza sua eselénsia Prezidente Repúblika sei ba levanta asuntu ne'e”, dehan PM Taur hafoin Finaliza Audénsia ho PR Horta iha Palásiu Prezidensial Bairo Pite, kinta (01/09).

Tanba prosesu Timor-Leste nian kona-ba Greater Sunrise ne'e naturalmente ida-ne'e kuaze sai mós tópiku boot ida ne'ebé sempre levanta husi Estadu Timor-Leste no Austrália.

Ba asuntu ida-ne'e, PM Taur rasik mós konsege levanta iha enkontru entre Xefe Governu ho Ministra Negósiu Estranjeiru husi Austrália nian no Governu rua ne'e kompromete buka dalan hotu para haree solusaun ba prosesu ida-ne'e.

Tanba ne'e, enkontru semanál ne'ebé hala'o ho Prezidente Repúblika, ko'alia oituan mós kona-ba atividade sira-ne'e liliu vizita husi Ministra Negósiu Estranjeiru Austrália nian mai Timor-Leste, nomós vizita ne'ebé Prezidente Repúblika sei hala'o ba Austrália iha fulan ida-ne'e.

Maibé ko'alia vizita Ministra Negósiu Estranjeiru husi Austrália ida-ne'e inklui konversa sira mós la'o di'ak los no vizita ne'e rasik atu reforsa kooperasaun bilaterál nomós diskute kooperasaun sira-ne'ebé sei la'o iha tempu tuir mai.

“Tanba hanesan ita-boot sira hatene estabelesimentu relasaun diplomatika ho Austrália ne'e kompleta tinan ida-ne'e ba 20 anos”, esplika nia. (*)