Ba inisiativa ida-ne'e, Ministru ba Asuntu Parlamentár no Komunikasaun Sosiál, Francisco Martins da Costa Pereira Jeronimo iha loron sábadu (30/07), deside hala'o diálogu ho komunidade suku Belulik Leten, Postu Administrativu Fatumea, Munisípiu Covalima liuhusi programa Governu iha povu nia le'et ho atividade ‘naroman ba suku’.

“Ami-nia prezensa iha ne'e, atu ko'alia ho komunidade sira hodi hatene saida mak komunidade sira presiza, saida mak komunidade sira-nia susar, saida mak komunidade sira-nia hakarak ba dezenvolvimentu rai ida-ne'e”, dehan Ministru Francisco iha nia intervensaun iha ámbitu diálogu ho komunidade sira iha Suku Belulik Leten, sábadu (30/07).

Tanba iha programa Governu nian mós, ema mak sai sentru ba dezenvolvimentu la'ós sasán, entaun programa hotu ne'ebé Governu daualu halo ne'e sei haree liuba oinsá atu dezenvolve ema, fó atensaun ba ema hotu nia nesesidade, atu lori povu sai husi mukit nian laran.

Nune'e MAPKomS fahe informasaun no rona preokupasaun hotu husi komunidade nian, nomós livre ba ema hotu atu ko'alia atubele fó kontribuisaun ba dezenvolvimentu iha rai ida-ne'e.

Xefe suku Belulik Leten, Quintino Amaral hatete, nia parte sente kontente no komunidade sira orgaullu ba prezensa membru Governu ba iha sira-nia suku.

‘Tanba ne'e lori komunidade nia naran agradese no apresia tanba liuhusi programa diálogu hanesan ne'e bele fahe informasaun no rona rasik saida mak sai preokupasaun ba komunidade sira”, hatete nia.

Maske iha atividade diálogu refere, komunidade sira levanta sira-nia preokupasaun kona-ba, estrada, eletrisidade, situasaun profesór kontratadu, problema idozu, edukasaun, kampu ba hala'o desportu, no mós problema sidadania ba komunidade sira ne'ebé hola ema Indonézia tanba postu administrativu Fatumea besik kedas fronteira.

Maibe ba preokupasaun sira ne'e, Ministru MAPKOMS hatete, kona-ba eletrisidade agora dadaun sei haree uluk suku, hafoin aldeia mak sei to'o ba bairo, enkuantu kona-ba ba asuntu sira seluk ne'e, parte MAPKOMS mós sei hato'o ba ministériu kompetente atubele buka solusaun.

Iha atividade diálogu refere, hetan partisipa direta husi Ministru Edukasaun, Armindo Maia, Vise Ministra Solidariedade Sosial no Inkluzaun (MSSI), Signi Chandrawati Verdial, Prezidente INDDICA, Presidente CLN, reprezentante SEKOOP, reprezentante MAP, reprezentante Saúde, autoridade lokál nomós komunidade sira. (*)