Ministru José dehan, durante ne’e internet ho kapasidade 200mbps (Megabit per second) ne’e fahe ba ajensia governu hamutuk 140, maibé daudauk ne’e ajensia governu nian sa’e on aba 205.
"Durante ne'e iha ajensia 140 governu nian maibé ate prezente data ita iha 205 agensia governu ninian, entaun signifika katak 200Mbps oferese ba 140 ajensia ne'e sa’e, entaun velusidade rede internet ba ajensia governu nian ne'e ladun funsiona ho di’ak,"
Atu bele rezolve problema ne’e, Ministru ne’e dehan, governu planeia atu hasa’e kapasidade internet husi 200Mbps ba 1GB per second.
“Rede internet ne'ebé durante iha hamutuk 200 MB per second dei't entaun halo komparasaun ho bee ida karik turuk dei't, ne'e nia implikasaun katak velusidade rede internet la funsiona ho di’ak,” dehan nia.
Ba oin, nia hatete, atu fornese internet Komisaun Nasional Aprovizionamentu mak sei hare no buka meius.
“Importante mak oinsa parte governu nian atu asegura rede internet hodi fasilita ajensia governu nian par bele hala’o serbisu ho di’ak,” nia hatete.
Molok ne’e, MTK aprezenta proposta ida atu hasa’e tan kapasidade satellite husi 200Mbps ba 1GB.
Ministru Reforma Lejislativa Asuntu Parlamentar Fidelis Manuel Leite Magalhães hatete, MTK aprezenta proposta atu atualiza banda larga husi satellite husi 200Mbps ba 1GB.
"Ohin MTK no Komisaun Nasional Aprovizionamentu aprezenta proposta deliberasaun rua ba Konsellu Ministru kona-ba prosesu aprovizionamentu antisipada atu atualiza ba banda larga husi satelite husi 200 MBS ba 1GB," dehan Ministru Fidelis iha palásiu governu, Kuarta (09/10/19).