Durante ne’e mosu preokupasaun barak relasiona ho publikasaun media center CNRT iha Media Sosial, liu-liu Facebook.

Tuir deputadu bankada Fretilin Francisco Miranda Branco hatete, durante ne'e media center CNRT halo espekulasaun no halo defamasaun hasoru lider nasional liu-liu Prezidente Republika.

"Buat ne'e tuir loloos kleur ona, mais nia estatutu loloos ne'e saida, foti iha plenária, balun dehan la'os sira nian, CNRT rasik deklara katak la'os sira nian, ne'e sira la koñese, ne'ebé la hatene loos médida saida mak presiza halo hodi responde ba situasaun ida ne'e. Iha média ida ne'ebé mai foti kestaun hodi hamosu issu ne'ebé la konstrutivu, la étika hanesan ita fó fali permisaun, ita admite hodi kuda kultura ida hatun malu, insulta malu, kultura ne'ebé laos pozitivu," dehan vise prezidente bankada Fretilin Francisco Miranda Branco iha sala bankada PN, Kinta (17/10/19).

Tuir Branco hatete, bainhira hakarak halo krítiku ruma, tenke krítiku ho konstrutivu la'os destroi.

"Iha konstrusaun estadu ejize elementu konstrutivu, edukativu, étika, respeita ba malu, iha sosiedade demokrátiku tanba iha insulta malu ne'e la'os hakiak kultura ida sivilizasaun," nia tenik.

MC CNRT, deputadu ne'e dehan, identifika aan hanesan média partidu nian ne'ebé lidera mós husi ema importante iha nasaun, maibé sai ezemplu la di'ak.

"Média ne'e identifika aan hanesan média partidu nian, no partidu ne'e rasik lidera husi ema ne'ebé boot iha nasaun ne'e, maibé ezemplu la di'ak atu hanorin sosiedade," dehan Branco.

Kona-ba medida, Branco hatete iha medida balun ne'ebé atu foti hodi responde ba situasaun ne'e maibé dalan laiha tanba na'in ba média seidauk identifika.

"Foti dala-barak ona, maibé na'in rasik dehan la'os sira nian, entaun ne'e anónimatu, nia na'in jurídika loloos ne'e mak see? Tanba nia estatutu ne'e hanesan anónimu, ne'ebé atu foti ba área justisa nian mós susar, labele prova tanba nia anónimatu hela de'it," dehan nia.