“Ha’u la menta e kondena SEFOPE tanba lakonsege halo mekanizmu ida ne’ebé di’ak, efisiénte no efikásia para bele halo prosesu rekrutamentu ida ne'ebé di'ak nafatin prejere ba dignidade husi joven sira”, dehan nia iha plenária Parlamentu Nasionál, segunda (13/06).

Tanba situasaun ne’ebé akontese iha loron segunda (06/06) ba joven Timoroan sira ne’ebé mak hakarak ba servisu iha Korea Súl bainhira ba rejista atu tuir ezame lian-Korea iha SEFOPE-Bekora, maibé hamosu de'it sentimentu tristeza ba deputadu sira tanba Governu la konsege trata joven sira ne'e atubele asesu ba rejistrasaun ho di'ak.

“Ha'u haree situasaun ida ke tristi tebes wainhira haree Joven sira dudu malu, sena malu, balun sa'e moru no hakat moru ne’e, balu hetan kanek dudu malu, ida-ne'e ita haree tuir lolos ne’e, ha'u nu’udar reprezenta povu ha'u la simu ho tratamentu ida ne’e”, afirma nia.

Ho nun'e husu ba SEFOPE atu halo esplikasaun no klarifikasaun ruma ba publika kona-ba situasaun sira ne'e tanba ida nee hanesan obrigasaun ida husi SEFOPE nian.

Deputada PD ne'e fó hanoin tuir loloos SEFOPE iha obrigasaun ida atu prejere joven hirak ne'e nia dignidade umana atubele partisipa iha prosesu rekrutamentu inklui rejista naran ba tuir formasaun Lian-Korea.

“Mesmu tau naran de’it mós tenke prejere ba, ema nia dignidade, ha'u la simu kuandu ha'u haree joven barak mak tenke dudu malu ida ke ariska sira-nia dignidade rasik. Ne'ebé husu esplikasaun señor Sekartariadu, presiza fó responde ida ke di’ak nomós iha dever atubele hadi’a ba oin situasaun ida hanesan ne’e labele akontse tan”, deklara nia. (*)