“Rezolusaun ida ne'e propoin dia 16 Outubru kada tinan atu sai loron nasionál ba liberdade Imprensa, atu hatudu katak ita kumpri Konstitusaun no ita nia polítika sira a favor ba liberdade Imprensa”, afirma Sekretária Meza Parlamentu Nasionál, Deputada Lidia Norberta, bainhira lee sai rezolusaun, iha PN, tersa( 24/05).
Nune'e parte husi Governo parabeniza, deputada sira iha Parlamentu Nasionál, tanba bele toma atensaun ba rezolusaun ida ne'ebé mai husi konsellu Imprensa hodi deside loron 16 Outubro sai loron nasionál ba liberdade Imprensa.
"Governu fó parabéns ba inisiativa di'ak ne'ebé mai husi konsellu Imprensa, no ita-nian deputada sira tanba sira fó atensaun, e ohin ita akompaña hothotu vota a favor, ne'e siknifika hothotu konkorda proposta husi Konsellu Imprensa, liliu kona-ba data ne'e (16/10)”, informa Ministru Asuntu Parlamentár no Komunikasaun Sosiál Interinu, Mericio Juvinal dos Reis ‘Akara’.
Iha rezolusaun ne'e, pontu balun ne'ebá liga mós ba kna’ar Governu nia, nune'e Governu kompromete sei nafatin prontu atu apoiu no kolabora hodi implementa rezolusaun sira ne'ebé mak sai husi Parlamentu Nasionál
"Ohin ha'u deklara ona katak, Governu prontu atu apoiu kolabora nafatin, atu implementa rezolusaun sira, liliu rezolusaun ne'ebé mak sai husi PN, ne'ebé Governu laiha pozisaun kontra ruma, parte Governu konkorda ho ida ne'e”, deklara nia. (*)
