“Problema mak ida ne'e, ida bengkel ne'ebé mak atu hadi'a ne'e, uluk problema ho bengkel tanba bengkel ne'e ladun profisionál, mais bengkel ne'e troka tiha ona, mais mosu fali ne'e iha patrimóniu Estadu ninian”, dehan Adriano iha plenária PN, tersa (24/05).

Tanba prosesu atu hadi'a karreta ne'e, hothotu tenke lori ba patrimóniu estadu haree tiha mak lori ba bengkel no bainhira bengkel hadi'a ona mos tenke lori fali ba iha patrimoniu estadu haree filafali.

Maibe buat ne'ebe, PD haree maka dala ruma buat balun ne'ebe aat bengkel identifika atu hadi'a, maibé parte husi patrimóniu Estadu lakohi, inklui bengkel sira husu atu teste lori sira sai ba liur mós patrimoniu Estadu dehan servisu barak.

Maske servisu lojistika kona-ba atu hadi'a karreta ne'e nu’udar asuntu internál, maibé PD hakarak ko'alia sai iha plenária laran tanba iha karreta ida ne'ebé mak lori ba atu hadi'a kuaze tinan rua para hela.

Aleinde iha karreta ida ne'ebé dadauk uza hela lori ba hadi’a, atu troka sasán balun hanesan besi tarutu iha karreta okos, maibé patrimónia Estadu la autoriza atubele troka, enkuantu sira hatan troka de'it mak boraixa.

“Travaun ida disku ne'e mós to'o agora mós sira patrimóniu Estadu nian mak lakohi troka, sira dehan lae ne'e di'ak hela", afirma nia.

Prezidente Parlamentu Nasionál (PN), Aniceto Longuinhos Guterres Lopes hatete, nia parte sei ko’alia ho Sekretáriu Jerál Parlamentu nian atubele trata asuntu ne'e ho di'ak.

Dadauk Parlamentu Nasionál atu hadi’a karreta ruma presiza lori uluk ba Patrimóniu Estadu no labele lori karreta direta ba bengkel tanba haree ba bengkel balun halo manipulasaun troka sasán arbiru.

“Kona-ba asuntu manutensaun karreta ninian, depois ha'u ko'alia ho sekretáriu jerál, ita lori ba patrimónia Estadu ne'e tanba fofoun bengkel sira ne'e mak hanesan manipula oituan. Sasán ne'ebé loloos la presiza troka maibé bengkel troka tiha, depois rekere mai osan selu ida ne'e sosa ida ne'e”, afirma nia.

Tanba prosedimentu sira ne'e Konsellu Administrasaun ho Sekretáriu Jerál Parlamentu Nasionál hasai tiha ona katak antes lori karreta ba bengkel, tenke lori uluk ba patrimóniu Estadu sira ne'ebé iha ekipamentu atu deteta sasán sira at. (*)