“Sim, ohin simu orientasaun husi PM, oinsá atu hadi’a di'ak liután obras públika nia servisu no iha preparasaun lubuk ida oinsá hadi’a di'ak liután no tau atensaun kona ba estrada rurál, kompleta eletrisidade ba ita-nia komunidade sira”, dehan Ministru Obras Públika (MOP), Abel da Silva Pires, iha Rezidénsia Ofisiál PM, Farol, sesta (22/04).

Tanba ne’e, sei bele halo esforsu, nune'e tinan 2022 ne'e suku hothotu iha Timor laran tomak sei asesu hotu ba liña eletrisidade no bee-moos.

“Ohin ha’u kontente, ha'u informa ba sua eselénsia katak ita bele halo esforsu para tinan ida ne'e ita kompleta suku hothotu iha Timor laran ne'e sei hetan eletrisidade no bee-moos, maibé ba bee-moos mak ha'u hanoin ita tenke reforsa tan Orsamentu oituan ba Bee Timor-Leste para bele fó biban ba sira atu implementa projetu bee-moos barak liután iha ita-nia komunidade nia leet”, hatete nia.

Ba progresu kalamidade 4 Abríl nia, maioria projetu sira ne'e iha ona prosesu Komisaun Nasionál Aprovizionamentu (CNA) hodi hein rezultadu

“Aleinde ne'e mós, PM husu kona-ba prosesu kalamidade, ha'u relata katak maioria prozetu ba rekuperasaun ne'e iha prosesu CNA ne'ebé agora ita akompaña hela, e kona-ba mós progresu liliu hadi’a estrada husi Manleu sa'e ba Sarlala-Aileu ne'ebá, ne'e dadaun iha ona prosesu verifikasaun husi ADN, ita hein katak tinan ne'e prosesu bele remata ona nune'e ita bele komesa hadi’a ona ita-nia estrada sira ne'e”, esplika nia. (*)