“Ha’u seidauk simu kazu ofisiál mai iha ha’u-nia gabinte. Publikasaun ne’ebé viral ne’e, Komandu mós akompaña, maibé seidauk iha ema ruma halo denunsia ba ida ne’e. Prosesu investigasaun kriminál ba ne’e, to’o agora laiha, maibé Komandu orienta ona atu buka tuir bazea ba konpeténsia ne’ebé lei fó ba polísia, hodi nune’e bele halo identifiksaun iha oras 12 nia laran”, dehan Komisáriu Faustino da Costa, iha komandu Jerál Kaikoli, domingu (17/04).

Ba imajen sira ne’ebé viral ne’e, imajen antigu ne’ebé iha ema balun hakarak publika filafali, hodi kria instabilidade iha tempu eleisaun nian. 

“Fotografia ida ne’ebé viral tebes iha mídia Sosiál ne’e, foto ne’ebé ke antigu, mak ema tenta atu share filafali”, informa nia.

Maske individu balun uza imajen ne’e hodi aproveita situsaun hodi provoka malu, maibé Komandu Jerál PNTL hosu atu públiku hakmatek nafatin no labele fiar informasaun falsu hirak ne’e.

Tanba ne’e, husu atu atu Governu aselera lei sibernetika, atu fó konpeténsia ba autoridade relevante, nune’e mosu situasaun sira hanesan ne’e, bele buka tuir ema ne’ebé hakarak kria instabilidade.

“Ita presiza iha lei sibernetika, tanba ne’e husu atu entidade relevante sira bele aselera  prosesu lei sibernetika, nune’e ita fasil buka tuir ema ne’ebe lansa imajen ka informsaun falsu sira iha mídia Sosiál”, dehan nia. (*)