Diretór Nasionál Diresaun Nasionál  Alterasaun Klimatika, Augusto Pinto, hatete, polítika alterasaun klimátika hetan ona aprovasaun husi konsellu ministru iha loron 22 fulan-dezembru tinan-2021.

"Iha kondisaun atu implementa polítika nasionál alterasaun klimátika ne'e, prezisa fó informasaun ba Minisitéiru relevante hotu, soseidade sivil, parte eskola sira para hatene," dehan Augusto ba www.tempotimor.com iha salaun sentru konvensaun baukau vila antiga, sesta (25/03).

Benefísiu husi formasaun polítika nasionál alterasaun klimátika iha nivél Munísipiu, atu hasa'e rezilensia ba altersaun klimátika liuhusi asaun, adaptasaun no mitigasaun.

Tanba ne'e, hahú ona  formasaun ho programa hanesan husi Munísipiu, Manatutu, Aileu, Ermera inklui Likisa, atu fó hanoin ba entidades hotu intera ona programa refere, tanba polítika nasionál alterasaun klimatika hahú eziste ona, nune'e bainhira Munísipiu iha planu bele enkaixa mós polítika nasionál alterasaun klimátika.

"Ita hatene katak, iha tinan-kotuk dia 4 abril, depois 3 marsu tinan-2 ba kotuk, la'os impaktu direita husi impaktu klimátika, maibé iha mós kontribuisaun husi mudansa klimátika ne'ebé aselera liután dezastre ne'e akontese bebeik," nia argumenta

Liuhusi fahe informasaun ba entidade sira iha Munísipiu atu halo asaun, adaptasaun no mitigasaun hodi hasa'e kbi'it hasoru altersaun klimátika ba futuru oin mai, tanba formasaun ne'ebé antes ne'e hahú husi nivél Postu hatudu ona progresu di'ak.

Nune'e, remata formasaun iha nivél Munísipiu, sei kontinua iha nivél suku teritóriu laran ho fundus global ambiente ho montante millaun 9 hodi identifika problema alterasaun klimátika husi nivél suku.

"Programa ida seluk tán, naran avaliasaun funerabilidade integradu iha nivél suku, ami planu ona ba suku 158," nia hatete

Planu implementa formsaun to'o iha nivél suku, atu povu hadomi ambiente no proteje bee matan, tanba dala barak bee matan ne'ebé antes ne'e debitu boot agora hahú menus, tanba impaktu husi mudansa klimátika.

Diretór Ensiñu Sekundária Jerál Nu.01 Tirilolo Baukau, Paulo Dias Menezes hatete, formasaun polítika alterasaun klimatika iha benef’isiu, tanba oinsá atu ambiente nasaun nian di'ak ho matak, tanba ne'e nia kompromete sei hatutan ba estudante sira iha nivél eskola.

"Ha'u bele hatene, ba formasaun ne'e di'ak, bainhira ami nia eskola moru hale'u, ha'u hakarak ha'u nia eskola sai matak liu iha Munísipiu Baukau," nia hatete

Entertantu partisipa iha formsaun hamutuk partisipante na'in-71, ne’ebé kompostu husi eskola-EBC vila nova, ESG 01 Tirilolo, ESSA, ESP 02 vila nova, Ensiñu superiór cristal paralelu Baukau, sentru formsaun A.UFD, CDC inklui sentru formasaun kailalu. (*)