“Proposta ida ne'e do halo hanesan de'it subsídiu montante ba Komisaun Nasionál ba Eleisaun sira (CNE) no STAE (Sekretáriadu Tékniku Administrasaun Eleitorál), rua ne'e labele diferente”, Ministru Presidénsia Konsellu Ministru (MPKM), Fidelis Leite Magalhaes, ba jornalista sira iha Palásiu Governu, kuarta (09/03).
Ho alterasaun ida-ne’e, ba oin sei atribui subsídiu ida ho valór hanesan ba Diretór-Jerál Sekretariadu Tékniku Administrasaun Eleisaun (STAE) no ba Prezidente Komisaun Nasionál ba Eleisaun sira (CNE) atividade loron-loron nian ne’ebé partisipa durante periodu eleitorál.
“Agora ne'e hahú nia kontajen husi data ne'ebé Prezidente Repúblika (PR) deklara loron eleisaun to'o hotu maibé ninia montante kerdizer ke loron aumenta maibé ninia montante jerál tun montante kada indivídu, se ha'u la sala husi nia montante CNE, STAe no diretór sira sei hetan $80.00 kada loron”, esplika nia.
Alende ne'e Ministru Administrasaun Estatál (MAE), Miguel Pereirra de Carvalho mós informa, sei halo alterasaun de'it hodi nune'e Diretór STAE sira hetan insentivu hanesan ho Prezidente CNE sira.
“Ne'e halo alterasaun de'it para Ekipa Diretór STAE ne'e nia insentivu hanesan ho Prezidente CNE sei hetan $80.00 por dia hanesan ho Diretór STAE tanba ida supervizaun no ida realiza eleisaun no ida hetan montante ki'ik liu ne'e $15.00 nia periodu durante a partir de Prezidente Repúblika deklara husi 16 fulan-janeiru”, dehan nia.
Tanba iha tinan anteriór sira balun simu insentivu bele hahú husi data Prezidente Repúblika pronúnsia data eleisaun maibé iha balun ne'ebé mak liu tiha semana ida ka rua mak foin halo kontajem maibé liuhusi alterasaun ne'e STAE ho CNE sira hahú halo kontajen insentivu hafoin Prezidente Repúblika dekreta data eleisaun prezidensiál.
Kontratadu espesifikamente sira hodi apoia preparasaun no realizasaun ba aktu eleitorál, ho kontratu durasaun badak to’o fulan neen, ne’ebé termu okorre tuirmai hafoin publikasaun akórdaun husi Supremu Tribunál Justisa ho rezultadu eleisaun nian, labele benefisia ba subsídiu estraordináriu, konsidera katak objetu husi ninia kontratu, eskluzivamente, apoia preparasaun no realizasaun aktu eleitorál, laiha medida ba ida-ne’e, kualkér aumentu estraordináriu husi serbisu. (*)
