“Depois Konsellu Ministru mós aprova dekretu lei ida ne'ebé mak depois haruka ba Prezidente Repúblika ba promulgasaun mak kriasaun númeru úniku emerjénsia nian, númeru ne'e mak sai hanesan liga fasilita bainhira atu kontaktu bombeiru ka ambulánsia ne'e la presiza fali númeru ketak ona maibé telefone ba númeru 112 depois mak sira liga ba fali bombeiru no ambulánsia no sira mak sei liga ba polísia”, dehan Ministru Fidelis Leite ba jornalista sira iha Palásiu Governu, kuarta (09/03)

Tanba iha ajente administrasaun ida ne'ebé mak sei atende komunidade sira bainhira hasoru dezastre ka problema ruma bele kontaktu ba númeru 112 hafoin sira liga ba kada númeru emerjénsia ba entidade relevante seluk.

Númeru 112 ne'e la'ós númeru foun maibé sosializa liután atu nune'e komunidade hasoru problema emerjénsia ruma bele kontaktu diretamente de'it ba.

“Kualker ita kontaktu, ita dezastre ruma ka ahi hán uma ka telefone ba de'it númeru ida ne'e depois mak sei iha sala situasaun iha sentru integradu ida sira mak sei servisu 24 oras no liga ba sira númeru emerjénsia sira-nia iha entidade relevante”, esplika nia.
Númeru emerjénsia ida-ne’e bele uza gratuita, kobre territóriu nasionál no permite asesu ba sistema emerjénia oioin, hanesan koordenadu husi Polísia Nasionál Timor-Leste, Servisu Nasionál Ambulánsia no Emejénsia Médika no Bombeiru.

Dekretu-Lei, ne’ebé aprezenta husi Ministru Interiór, Taur Matan Ruak no husi Vise-Ministru Interiór, António Armindo. (*)