Inaugurasaun tanki bee ne'ebé konstrui husi, hetan akompaña husi Kandidatu Prezidente Repúblika, José Ramos Horta, sesta (04/03) no ekipa sira inklui komunidade sira iha Aldeia Fatuhadan Suku Uma Ain Kraik, Postu Administrativu Vikeke Vila Munisípiu Vikeke.

Xefe Aldeia Fatuhadan, Salvadór Soares hatete, konstrusaun Tanki bee-moos ne'e hanesan inisiativa ida husi Grupu Movimentu Brigada Xanana (MBX) no hetan apoiu orsamentu husi Komunidade sira.

“Ida ne'e la'ós kompaña ka ONG Organizasaun Naun Governamentál (ONG) mak konstrui, ida ne'e, husi Organizasaun Brigada sira rasik mak mai hari’i, no nesesidade mai husi Grupu Brigada, no ami komunidade hotu mós tau osan oituan-oituan tau hamutuk mak hodi realiza konstrusaun tanki ida ne'e dada bee husi fali mota mai”, dehan nia hafoin partisipa serimónia inaugurasaun tanki bee iha aldeia Fatuhadan Suku Uma Ain Kraik, sesta (04/03).

Ba kontrusaun tanki ne’e, kolabora hamutuk ho komunidade sira hodi soe osan kuaze rihun $2 hodi realiza konstrusaun refere.

Tanba ne'e komunidade Aldeia Fatuhadan, Suku Uma Ain Kraik, deside aproveita ho kampaña loron datoluk nian ne'ebé Xanana ho Horta halo iha Munisípiu Vikeke, hodi konvida inaugura hela tanke bee ida ne'e ba komunidade sira.

“Momentu kuandu udan boot, entaun ha’u-nia komunidade iha ne'e sai vítima ba bee-moos, tanba ne'e sira foti rasik inisiativa, halo ida ne'e”, hatete nia.

Maibé ko’alia kona-ba estrada, ida ne'e Komunidade rasik mós preokupa tanba tinan barak ona seidauk asesu ba estrada.

“Komunidade iha ne'e hamutuk 192 uma-kain (kepala keluarga), Eletrisidade asesu ona, estrada mak seidauk asesu”, informa nia.

Ho preokupasaun ne'e, nu’udar autoridade komunitáriu hakarak rekomenda ba Governu liuhusi média nasionál sira, para oinsá bele loke matan ba situasuan estrada ida ne'e.

“Atu nune'e ami-nia inan feton sira, karik atu evakua ba ospitál atu partu, entaun sira bele asesu ba estrada, tanba ida ne'e mak ami rekomenda”, afirma nia. (*)