Akontesimentu ne’e monta konsege lori komunidade na’in-neen, maske na'in ida hetan ona ho kondisaun mate no na’in-lima seluk seidauk hetan to’o agora.
Administradór Postu Administrativu Lakló, Samuel Rodriguês Pereira esplika, vítima sira ne'e bee lori lakon, tanba hakur mota Lakló atu ba to'os no natár ne'ebé durante halo, maibé to'o iha mota klaran, mosu korente mota nian ho velosidade boot tun derepente lori sira lakon.
Nia dehan, nu'udár autoridade ida iha postu ne'e, sente preokupa ho dezastre naturál ne’ebé akontese provoka udan, anin halo inundasaun maka'as no halakonkomunudade nia vida.
“Dezastre ne’e rezulta mós komunidade hamutuk 6 mak lakon vida, entre vitima na’in-6 ne’e nia mate isin to’o oras ne’e foin hetan mate isin na’in-ida (1) no mate isin na’in 5 seluk seidauk hetan to’o agora”, informa nia iha Bidau Lecidere, tersa (05/04).
Dezastre ne’ebé mosu la'ós halakon de'it ema nia vida, maibé estraga direita povu nia natar kuaze 5000 ektatare no estraga to'os hamutuk 200 ektare. Inklui mós kolam ikan 60 ne’ebé atu koilleta.
Aliende ne’e estraga mós plantasaun ai-han no komunidade nian animal karau luhan 6, bibi luhan 5 inklui animál ki’ik sira seluk.
Iha ne’e, mota estraga mós estrada ligasaun Obrato ba Postu Administrativu Lakló difikulta tebes transporte públiku no privádu atu halo movimentu.
Estrada ligasaun Lakló Sentru Postu-Administrativu ho distánsia metru 700 ne’ebé, iha tinan 2019 hetan reabilitasaun husi Kompaña Egana Unip Lda ninia obra reabilitasaun ne’e la konsege hotu.
Tuir dadus ne’ebé autoridade sira rekolla, uma ka’in tolu (3) hetan estragu totál iha Postu-Administrativu Laklo, uma kain 25 bee tama no uma ka’in 28 sai ameasa boot ba inundasaun.
"Oras ne’e dadaun komunidade sira evakua provijóriu ba sede suku ne’ebé besik no Salaun Parókia hodi hein to'o situasaun rekupera sira sei fila hodi hadi'a sira nia fatin”, hatete nia.
Ba preukupasaun ne'e, nia husu ba governu liuhusi ministériu kompetente atu urjentemente bele rezolve komunidade sira-nia problema iha tempu badak.(*)